Әлемнің ең құрғақ аймағы Чилидегі Атакама шөлінде гүл өсе бастады. Жай ғана өсіп тұрған жоқ, далада жаппай жайқалып тұр. Бұған ғалымдар аң-таң . Жердің құрғақтығынан бөлек, тамшы тамбайтын шөлдің гүлге орануы сирек құбылыс.

Андрес Белльо университетінің биотехнологтары енді өсімдіктердің мұндай қатал ортада қалай тірі қалатынын анықтауға тырысып жатыр. Тұқымын алып, құрғақшылыққа төзімді дақыл түрлерін шығару да ойда бар.

Ариэль Орельяна, Андрес Бельо университетінің өсімдіктер биотехнологиясы орталығының директоры:

- Атакама — әлемдегі ең құрғақ әрі ең күн сәулесі көп түсетін аймақ. Мұндай қатал ортада гүлдің өсіп тұрғаны ғажайып. Біз оның қалай бейімделетінін түсінгіміз келеді. Сол арқылы ыстық пен су тапшылығына төзімді жаңа дақылдар өсіруге мүмкіндік аламыз.