Қала құрылысына қатысты барлық құжаттар мемлекеттік сараптамадан өтеді.

Бұл туралы Өнеркәсіп және құрылыс министрі Ерсайын Нағаспаев Мәжіліс кулуарында айтты, деп хабарлайды inbusiness.kz сайты.

"Енді қала құрылысына қатысты барлық құжаттар мемлекеттік сараптамадан өтетін болады. Бұрын ондай талап болмады. Әкімдік өз шешімімен егжей-тегжейлі жоспарлау жобаларын өзгерте алатын. Мәселен, әлеуметтік нысан салынуы тиіс жерге тұрғын үй кешені не бизнес орталық салуға рұқсат беретін. Енді барлық жоспарлау жобалары Бас жоспарға сәйкестігі бойынша қаралады", – деді Ерсайын Нағаспаев.

Министрдің сөзінше, бұрын егжей-тегжейлі жоспарлау жобалары жылына екі рет өзгертілетін. Енді жаңа Кодексте оны екі жылда бір рет қана өзгерту нормасы көзделіп отыр.

"Мемлекеттік органдардың құзыреті артуда, яғни жалпы алғанда мемлекеттік бақылау айтарлықтай күшейеді. Бұрын нысанды қабылдау актісіне төрт тарап қол қоятын: тапсырыс беруші, мердігер, техникалық қадағалаушы және авторлық қадағалаушы. Енді бұл тізімге Мемлекеттік сәулет-құрылыс басқармасы да қосылып, олардың да қолы болуы тиіс", – деп түсіндірді ведомство басшысы.

Оның айтуынша, ғимаратты пайдалану кезінде қандай да бір мәселе туындаса, ортақ жауапкершілік пайда болады.

"Яғни, құрылыс салушылар Мемлекеттік сәулет-құрылыс басқармасы сияқты жауапкершілікті арқалайды. Егер ғимаратта ақаулар анықталса, мемлекет те сол үшін жауап береді", – деді Өнеркәсіп және құрылыс министрі.