Бұл мәселемен құзырлы министрлік айналысып жатыр.

Мәжіліс депутаты Асхат Аймағамбетов жекеменшік мектептердің осы жылдан бастап қатты ушыққанын айтты, деп хабарлайды inbusiness.kz сайты.

Депутат жекеменшік мектептердің проблемасы бар екенін мойындады.

"Бұл мәселе көбінесе осы жылдан бастап қатты ушықты. Өйткені алдыңғы жылы министрлік тиісті өзгеріс енгізді. Яғни, егер бұған дейін қаржыландыру республикалық бюджеттен, яғни бір орталықтан берілетін болса және қаржыландыру мәселесі шешіліп отырса, қазіргі уақытта оны әр әкімдікке бөліп берді. Енді ол әр әкімдіктің құзыретінде. Біріншіден, қаражат та жетпей жатыр. Екіншіден, жалпы осы механизмнің өзі бүгінгі күні тиімді жұмыс істеп жатқан жоқ. Тіпті ақша болып тұрғанның өзінде әр әкімдіктің түзетуі, бюджеттік қарауы, қаржыландыру жоспарлары, бюджеттік процесс өте үлкен ғой. Осындай мәселелер көп. Бізде үміт бар", – деді Асхат Аймағамбетов редакция тілшісінің сауалына берген жауабында.

Оның айтуынша, жаңадан тағайындалған Оқу-ағарту министрі Жұлдыз Сүлейменова бұл мәселемен жеке айналысып жатыр.

"Өте білікті маман. Осы сұрақпен жақсы таныс. Бұл мәселені толығымен шешеді деп сенемін", – деді Мәжіліс депутаты.

Айта кету керек, бұған дейін депутат тұрғын үйден бұрын мектеп пен балабақша салынуы керек екенін айтқанын жазғанбыз.