Құзырлы орган жаңа Құрылыс кодексінің жобасын таныстырды.

Енді нысанды қабылдау кезінде Мемлекеттік сәулет-құрылыс бақылау басқармасы мен төтенше жағдай органдары міндетті түрде қатысады. Бұл туралы Өнеркәсіп және құрылыс министрі Ерсайын Нағаспаев айтты, деп хабарлайды inbusiness.kz сайты.

"Соңғы жылдары "Doing Business" көрсеткішін жақсартуға бағытталған шаралардың салдарынан сәулет пен құрылыс салаларындағы мемлекеттік бақылау деңгейі төмендеді. Бүгінде құрылыс нормаларын сақтау міндеті тікелей сала қатысушыларының өздеріне жүктелген. Нәтижесінде құрылысқа толыққанды бақылау мен қадағалау жүргізілмейді. Осыған байланысты, жаңа Құрылыс кодексі аясында бақылау мен қадағалауды күшейтуге бағытталған жаңа тәсілдер әзірленді", – деді Ерсайын Нағаспаев.

Өнеркәсіп және құрылыс министрі өткен жылдан бастап "жедел әрекет етудің" жаңа тетігі енгізілгенін еске салды.

"Қадағалаудың жаңа форматы заң бұзылған жағдайда жедел шара қолдануды көздейді. Қажет болған жағдайда құрылыс жұмыстары тоқтатылып, лицензия мен өзге де рұқсат құжаттарын қайтарып алу мүмкіндігі қарастырылған. Құрылыс сапасын қатаң қадағалау үшін бақылау органдарының қатысуымен құрылыс барысы "жоспарлы инспекциялау" арқылы басынан бастап, пайдалануға берілгенге дейін тексерілетін болды. Енді профилактикалық бақылау қашықтан, яғни объектіге бармай-ақ жүргізілетін болады", – деп атап өтті ведомство басшысы.

Бұл үшін мемлекеттік органдардың деректері мен ақпараттық жүйелер пайдаланылады, қажет болған жағдайда дереу шара қабылданады. Сонымен қатар, әкімдіктердің жұмысына да бақылау артпақ.

"Құрылыс кодексі жобасында нысанды қабылдау кезінде Мемлекеттік сәулет-құрылыс бақылау басқармасы мен төтенше жағдай органдарының міндетті түрде қатысуы қарастырылған. Олар нысанның пайдалануға дайын екендігі туралы қорытынды береді. Жаңа заңнамалық өзгерістер құрылыс циклінің басынан аяғына дейін мемлекеттік бақылауды күшейтуді көздеп отыр", – деді Өнеркәсіп және құрылыс министрі.

Айта кету керек, бұған дейін жаңа Құрылыс кодексінде сейсмикалық қауіпсіздікке жеке тарау арналғанын жазғанбыз.