Александр 2025 жылғы маусымның басым бөлігін жарақат салдарынан өткізіп алды. Ол наурыз айының басында Грекияда өткен жарыстар сериясына дайындық кезінде оң жамбас сүйегін сындырып алған еді.

Атақты велошабандоз Александр Винокуровтың ұлы, XDS Astana Development Team командасының велоспортшысы кіші Александр Винокуров мансабын аяқтады.

23 жастағы қазақстандық спортшы үшін соңғы жарыс Малайзияда өткен "Лангкави Туры" болды. Онда ол XDS Astana Team сапында өнер көрсетіп, командаластарына көмектесті.

– Шешім қабылдау оңай болмады. Жарақаттан айығып жүргенде болашақ туралы көп ойландым. Соңғы жылдары жарақаттар жиі кедергі болып, жоспарларды бұзды, еңбектің бәрін жоққа шығарды. Ал биыл жағдай мүлдем қиындады. Грекияда алған жарақат өте ауыр болып, қалпыма келу ұзаққа созылды. Бірақ бір нәрсеге сенімді болдым – мансабымды ауруханада аяқтағым келмеді, — деді кіші Александр Винокуров.

XDS Astana Team бас менеджері Александр Винокуров ұлының шешіміне түсіністікпен қарап, пікір білдірді:

– "Алекс өз шешімін қабылдады. Мен оны толық құрметтеймін. Қазіргі заманда велоспортта бәсекеге қабілетті болу өте қиын, әсіресе жарақаттар жиі кедергі болса. Сол себепті ол мансабын аяқтауды жөн көрді. Соңғы жарысы өте сәтті өтті. Ол бауырына және командаластарына тамаша нәтиже көрсетуге көмектесті. Бұл үлкен жетістік. Енді оның өмірінде жаңа кезең басталады. Шын жүректен табыс тілеймін!", – деді Винокуров.

Айта кетейік, Александр Винокуровтың екінші ұлы Николя Винокуров елордалық велокоманда сапындағы өнерін одан әрі жалғастырады.