Ең алдымен өз нөмірін Мобильді азаматтар базасында дұрыс тіркелуін – тұрғын үй кезегінде тұрған азаматтар тексеруге тиіс. Бұл Отбасы банк ("Бәйтерек" холдингінің еншілес ұйымы) азаматтармен уақытылы байланысып, тұрғын үйді бөлуге қатысты маңызды ақпаратты жеткізуі үшін қажет.

Мобильді азаматтар базасындағы жаңартылған телефон нөмірі – бұл мемлекет пен Отбасы банкінің қазақстандықтармен байланыс орнатудағы негізгі бағыт:

• Актуалды нөмірге тұрғын үйді бөлу туралы SMS-хабарламалар жіберіледі;
• МАБ-да тіркелген нөмір арқылы мемлекеттік бағдарламаларға қатысуға болады;
• Актуалды нөмір өз уақытында өтінім беріп, тұрғын үй алу мүмкіндігін жіберіп алмауға көмектеседі.

Егер азаматтың нөмірі Мобильді азаматтар базасында тіркелмеген немесе ескірсе, Отбасы банктен жалдамалы немесе несиеге берілетін тұрғын үйді бөлу туралы хабарламаларды алмай қалу қаупі бар.

МАБ-да (Мобильді азаматтар базасында) нөмірді қалай тіркеуге немесе жаңартуға болады?

1. eGov Mobile қосымшасына немесе egov.kz сайтына кіріңіз;
2. ЭЦҚ (электрондық цифрлық қолтаңба) немесе Mobile ID арқылы жүйеге кіріңіз;
3. egov.kz сайтындағы жеке кабинетте өзіңіздің актуалды телефон нөміріңізді көрсетіңіз, ал eGov Mobile қосымшасында — профильді ашып, өз атыңызды басып, нөміріңізді тексеріңіз. Егер нөмірді өзгертсеңіз, оны 1414-тен келген SMS-код арқылы растау қажет.

Осыдан кейін сіздің нөміріңіз ЖСН-мен (Жеке сәйкестендіру нөмірімен) байланысады, және Отбасы банк пен мемлекеттік органдардан келетін барлық хабарлама дәл осы нөмірге жіберіледі.

2025 жылдың 24 мамырынан бастап Отбасы банк ұлттық даму институты мәртебесін алды. Осыған байланысты тұрғын үйге кезек жүргізу қызметі, оны ұзақ жылдар бойы атқарған жергілікті атқарушы органдардан (әкімдіктерден) Отбасы банкке берілді.

Азаматтардың электрондық деректер базасын қабылдау процесі бірнеше айға созылды. Бүгінгі күні банктің қарамағына барлық 647 779 жазба толықтай берілді.

Келесі кезең – кезек тізімін түгендеу. Осы жұмыс аяқталған соң тұрғын үйді бөлу процесі басталады – яғни жалдамалы және несиелік тұрғын үйлер үлестіріледі.

Несиелік тұрғын үйді ең төменгі 10% бастапқы жарнамен сатып алуға болады. Пайыздық мөлшерлемелер жылдық 2% (ЖТСМ 2%–2,1%) және 5% (ЖТСМ 5,2%–5,8%) деңгейінде белгіленген.

Қазір Отбасы банк өңірлердің әкімдіктерімен дайын тұрғын үй нысандарын беру туралы келісімдер жасасуда. Тұрғын үйді бөлу процесі 2025 жылдың қазан айында басталуы үшін, тұрғын үй кезегінде тұрған азаматтар жеке деректерді жинауға және өңдеуге келісім беруі қажет.

Кезекте тұрғандар туралы барлық мәліметті Отбасы банк мемлекеттік деректер базаларынан алады. Бұл – мемлекеттік қолдау шаралары әділ түрде жүзеге асып, шынымен мұқтаж азаматтарға жетуі үшін жасалып отыр.

Келісім беруді orken.otbasybank.kz порталының жеке кабинетінде орындау қажет. Ол үшін келесі қадамдарды орындаңыз:

1. Компьютерден (Google Chrome, Safari) браузер ашып, іздеу жолағына https://orken.otbasybank.kz/ сілтемесін енгізіңіз;
2. Негізгі беттегі оң жақ жоғарғы бұрышта орналасқан "Кіру" батырмасын басып, жүйеге кіріңіз. Авторизация үшін ЭЦҚ (электрондық цифрлық қолтаңба) қажет;
3. Жүйеге кіргеннен кейін жеке кабинет бетінде "Деректерді жинауға және өңдеуге келісім" атты терезе ашылады. Онда деректердің қандай мақсатта пайдаланылатыны туралы ақпарат беріледі.Ақпаратпен танысқан соң, міндетті түрде "ИӘ, мен өтінішпен таныстым" деген белгі қою қажет. Осыдан кейін "ЭЦҚ арқылы қол қою" батырмасы белсенді болады;
4. Соңында "ЭЦҚ арқылы қол қою" батырмасын басып, келісімді растаңыз.

Қол қойылған келісімнің артықшылықтары:

• Тұрғын үй мәселесін шешуге арналған мемлекеттік қолдауды нақты және жылдам алу;
• Жеңілдетілген несиелерді бөлуге қатысу;
• Мемлекеттік қолдаумен жалдамалы тұрғын үйді рәсімдеу.

Мәтіннен қате тапсаңыз, бізге жазыңыз