Ең танымал есімдер қатарында бұлардан бөлек, Омар, Ибрахим, Айсафи бар.
"Азаматтарға арналған үкімет" мемлекеттік корпорациясының Шымкент қалалық филиалы қалада дүниеге келген сәбилерге қойылатын ең танымал есімдерді жариялады. Өңірде арабша және Ислам дініне сәйкес келетін есімдер жиі қойылады.
"Соңғы жылдары ата-аналардың талғамы өзгеріп, балаларға шығыстық мәні бар әдемі есімдер жиі қойылып жүр. Мысалы, қыздарға – Маруа, Хадия, Айсафи, ал ұлдарға – Омар, Әбу Бәкір, Ибрахим есімдері танымал бола бастады", – делінген хабарламада.
Дегенмен, Шымкентте қазақ есімдерін таңдайтын ата-аналар саны да көп. Ал ең жиі қойылатын қазақ есімдері арасында Көркем, Аяулым, Айкөркем және ұлдар арасында Ертұлға, Әміре, Дарын есімдері танымал.
"Әр есім – ата-ананың жүрек қалауынан туған ерекше таңдау. Ол баланың болашақтағы бейнесін қалыптастыруда үлкен рөл атқарады", – деді Шымкент қалалық филиалының директоры Айнұр Тобаева.
Айта кетейік, 2025 жылдың басынан бері Шымкентте 20 мыңнан астам нәрестеге туу туралы куәлік берілген.
Оқи отырыңыз: Адамның тағдыры есіміне байланысты ма?
