Елордада «Қазанат» атшабарында ұйымдастырылған ауыл шаруашылығы жәрмеңкесінде Саржалдың қымызы мен Атыраудың бекіресі ұсынылды, деп хабарлайды 24kz.

Өнімдер тұрғындарға нарықтағы бағадан 15% арзан сатылды. Сапалы өнімді іздеген жұрт жәрмеңкеге көптеп ағылып жатыр.

Серік Селеубайұлы, тілші:

- Саба-саба қымыз, астау-астау ет пен ернеуден асқан құрт-май. Астаналықтар үшін Абай және Атырау облысының шаруалары әкелген базарлық осындай. Өнімнің сапасымен қатар бағасына да халықтың көңілі толып тұр.

Блиц 1:

- Менде құрт, сүзбе, қатық бар. Сары май, бауырсақ, жент, талқан бар. Сорпа, құрттар бар. Қымыз бар. Ауылдан әкелгенбіз. Шамам келгенше халықтың жағдайына қарап арзандау беріп жатырмын.

Блиц 2:

- Кеше басқа баға болған. Кеше 3 мыңнан сатылған. Бүгін базардың аяғы.

Блиц 3:

- Арзан, арзан. Үй жақта төрт мыңнан аламыз. Мына жерде үш мың үш жүзден.

Блиц 4:

- Бағалары жақсы. Үш жарымнан, үш мың үш жүз, үш мың екі жүзден сиырдың еті.

Фермерлер осы жолы 400 тоннадан астам өнім алып келген. Баға нарықтағыдан 10-15% төмен. Әсіресе, әр өңірдің өзіне тән тауарларына сұраныс жоғары.

Мақсат Жаңабаев, қалалық инвестициялар және кәсіпкерлікті дамыту басқармасы басшысының орынбасары:

- Абай облысының ерекшелігін өздеріңіз білесіздер, ол – ет. Ет, сүт өнімдері, қымыз. Атырау облысы шұбат, ет өнімдері, балық өнімдері. Соның бәрі ұсынылуда. Жалпы жәрмеңкеге адам санының, халықтың келуі көп. Біз төртінші жәрмеңкені өткізудеміз. Аптаның жексенбісі сайын. Соның нәтижесінде 50 мыңнан астам адамдар келіп отыр.

30 тамыздан басталған жәрмеңке әр аптаның демалыс күндері өтеді. Өңір басшылары шаруаларға өз тауарын жеткізу үшін жүк көліктерімен қамтып, елорда әкімдігі сауда орнын тегін ұсынады.

Авторлары: Серік Селеубайұлы, Өрден Жарқын