Павлодарда жолаушылар автобусы мен жеңіл автокөліктің қатысуымен жол апаты болды. Жол-көлік оқиғасы салдарынан жеті адам зардап шекті, олардың төртеуі балалар, деп облыстық жедел жәрдем станциясына сілтеме жасаған KAZ.NUR.KZ хабарлайды.

Павлодар көшелерінде автобус пен жеңіл көліктің соқтығысып қалғаны туралы ақпарат Instagram-дағы tipavlo.dar парақшасында жарияланды.

Облыстық жедел жәрдем қызметінің NUR.KZ тілшісіне берген ақпаратына сәйкес, жол апатына қатысты шақыру 16:38-де келіп түскен. Оған Торайғыров пен Сәтпаев көшелерінің қиылысында маршруттық автобус пен жеңіл автокөліктің соқтығысуы себеп болған.

"Жеті адам зардап шекті, олардың ішінде төрт бала бар. 1937, 1969 және 1989 жылдары туған үш әйел Павлодар қалалық №1 ауруханасына жеткізілді. 2013 жылы туған қыз бала және 2012, 2016 және 2017 жылы туған үш ұл бала облыстық балалар ауруханасына жеткізілді", — делінген хабарламада.

Павлодар облысы полиция департаментінің хабарлауынша, жол-көлік оқиғасына қатысты тексеріс жүргізіліп жатыр.

"Алдын ала мәлімет бойынша Сәтпаев пен Торайғыров көшелерінің қиылысында автобус пен Lada автокөлігі соқтығысты. Жол апатына қатысты тексеріс жүргізілуде", — деді полиция өкілдері.

Мәтіннен қате тапсаңыз, бізге жазыңыз