7,4 млн оқырманы бар танымал қазақстандық блогер Нұртаза Нұрбек әлеуметтік желіде лотерея өткізгені үшін айыппұл төледі. Бұл туралы туризм және спорт министрлігіне сілтеме жасаған KAZ.NUR.KZ хабарлайды.

Ведомствоның ақпаратына сәйкес, Алматы қаласы бойынша Экономикалық тергеу департаменті Instagram әлеуметтік желісінде заңсыз лотере ұйымдастыру фактісін анықтады. Кейін ЭТД қызметкерлері Ойын бизнесін және лотереяны реттеу комитетіне хат жолдады.

"Материалдарды қарау барысында "Justking31" парақшасында Алматы қаласындағы екі қабатты үйді ұтысқа тігу, сондай-ақ ақшалай қаражат пен смартфондарды ойнату іс-шаралары күн сайын өткізілгені анықталды. Бұл ретте азаматтарға ұтыс ойынына қатысу үшін Oilan Lab ЖШС-іне тиесілі 29 990 теңгелік оқу курстарын сатып алу қажет болған. Жеңімпаздар "Поле чудес" жабдығы арқылы кездейсоқ әдіспен таңдалған", — делінген министрлік хабарламасында.

Нәтижесінде әкімшілік құқық бұзушылық туралы кодекстің 803-бабына сәйкес, «Justking31» аккаунт иесіне ҚР ӘҚБтК-нің 445-1-бабының алтыншы бөлігі бойынша (лотерея және лотерея қызметі туралы заңнаманы бұзу) әкімшілік құқық бұзушылық туралы хаттама жасалды.

Аталған факт бойынша істі Комитет қарап, 300 АЕК көлемінде айыппұл салды. Істі қарау барысында аккаунт иесі кінәсін толық мойындап, айыппұл төледі.

Мәтіннен қате тапсаңыз, бізге жазыңыз