Ол сирек кездесетін аурумен 8 жылға жуық уақыт арпалысқан.

3 күн бұрын ғана 26 жастағы жігіттің жағдайы туралы ақпарат жарияланған еді, деп хабарлайды inbusiness.kz сайты.

Өкінішке қарай, бүгін 3 қыркүйектен бері жансақтау бөлімінде жатқан қазақ баласы Ерлік Дамеров мәңгілік мекеніне аттанды.

– Ол жасанды тыныс алу аппаратына қосылған. Мамандар оны дәрілік комада ұстап, диализ жүргізді. Әлі есін жиған жоқ, бірақ жақсы жаңалық бар. Дәрігерлер препараттар санын азайтып, оны комадан шығара бастады. Ерлік ата-анасының дауысын таниды, реакция береді. Көп ұзамай көзін ашады деп сенеміз, – деп жазылған еді бұған дейінгі жазбада.

Айта кетейік, Ерлік Дамеровке Кореяда ота жасалды. Емнің қымбат болуына байланысты ата-анасы халықтан қаржылай көмек сұраған-ды. Бүгін қаражат жинау тоқтатылды.

Ерліктің дерті алғаш рет 19 жасында анықталған. Жамбас тұсында пайда болған ауырсынуды дәрігерлер әуелі қарапайым протрузия деп ойлап, ол кейін асқынып, жігіттің жағдайы нашарлай түсті. Содан кейінгі тексеруден соң дәрігерлер Ерлікке "хондросаркома" диагнозын қойды. Сол уақыттан бері ата-анасы ұлының өмірі үшін барынша күресіп бақты. Оған екі рет ота жасалды, бір аяғы ампутацияланды.