Спорт журналисі Аслан Каженов Англияның Ливерпуль қаласында өткен әлем чемпионатында Санжар Тәшкенбайды жеңісінен кейін мемлекет басшысы хабарласқанын айтты.

Бұл туралы Caravan.kz медиа порталы хабарлайды.

Аслан Каженов “Бірінші бол” You Tube арнасына берген сұхбатында мемлекет басшының хабарласқаны боксшыларға жігер сыйлағанын айтты.

”Санжардың жартылай финалдағы үшінші раунды көңілден шықпай, Қайрат Сәтжановтың боқтап жібергені трансляциядан естіліп қалды деген ақпарат тарап жатыр ғой. Ол да Санжардың финалға дейін жиналуына әсер еткен шығар. Себебі, жартылай финалдағы жекпе-жекте жеңсе де, бапкерінің де, өзінің де көңіл-күйі түсіп шықты. Оның үстіне кеудесіне қатты соққы тиді. Жарақат алып қалған жоқ па екен деп уайымдадық. Десе де өте қысқа уақытта, бір күнде жиналып шығып, финалда керемет жұдырықтасып, таң қалдырып, айқын басымдықпен жеңіске жетті.

Сонымен қатар, Санжар финалдағы жекпе-жектерді бастап берді. Бастау да қиын ғой. Бірінші алтын басқаларға да қатты әсер етеді, мотивация болады. Санжардан кейін мемлекет басшысы хабарласыпты. Федерация президенті Шахмұрат Мүтәліптен сұхбат алған кезде айтты. Оның өзі де серпілтіп жіберген. Назар аударылып жатыр, мемлекет басшысына дейін қарап отыр деп жігерлендіріп жіберген”, — дейді ол.