" Қайрат " Лиссабонда "Спортингтен" ірі есеппен ұтылды.

Алматылық "Қайрат" Чемпиондар лигасы аясында сырт алаңда Португалияның "Спортинг" командасымен кездесіп, 4:1 есебімен жеңілді, деп хабарлайды Sports.kz.

Матч Лиссабонда, "Жозе Алваладе" стадионында өтті. Қақпашы Шерхан Қалмырза 24-минутта пенальтиді қайтара алғанымен, үзіліске дейін Франсишку Тринкан алыстан соққы жасап, есеп ашты.

Екінші тайм басында Еркін Тапалов пен Дастан Сәтбаев есепті теңестіруге жақын болды, алайда сәтті пайдалана алмады. Қалмырзаның қателігінен кейін Луис Суарес қауіпті соққы бағыттады, бірақ ол қақпаға дарымады.

64–68 минуттар аралығында "Қайрат" қақпасына үш бірдей гол соғылды: Тринкан, Алиссон Сантос және Джовани Кенда мергендігімен көзге түсті. 86-минутта Эдмилсон есепті қысқартқанымен, ойын 4:1 есебімен "Спортингтің" пайдасына аяқталды.

Оқи отырыңыз: Анарбековтің жарақаты мен "Реалдың" құрамы. "Қайрат" – "Реал Мадрид" матчынан не күтеміз

Келесі ойын 30 қыркүйекте Алматыда өтеді. Бұл жолы "Қайрат" өз алаңында мадридтік "Реалды" қабылдайды.