Елімізде оқушыға тұңғыш рет "Қазақстан Республикасының Еңбек сіңірген спорт шебері" атағы берілді, деп хабарлайды елорда әкімдігінің ресми сайтына сілтеме жасаған KAZ.NUR.KZ.

Ведомствоның мәліметінше, Астана қаласындағы №70 мектеп-лицейінің 11-сынып оқушысы Аңсат Алдияр Исатайұлы "Қазақстан Республикасының еңбек сіңірген спорт шебері" атағына ие болған.

"Бұл – елімізде мектеп оқушысына тұңғыш рет беріліп отырған мәртебелі марапат.

Жас шахматшы Алдияр Қазақстан спортының мақтанышы. Ол әлемдік деңгейдегі түрлі беделді додаларда қарсыластарын шаң қаптырып, талай рет жеңімпаз атанды.

Әлем чемпионаттары мен халықаралық турнирлерде топ жарып, еліміздің атын танытып, көк туымызды биікте желбіреткен жас әлем чемпионы", — делінген хабарламада.

Айта кетелік, кеше, 18 қыркүйекте мемлекет басшысы Ливерпуль қаласында өткен бокстан әлем чемпионатындағы спорттық жоғары жетістіктері үшін бір топ спортшы мен бапкерді марапаттаған еді.

Мәтіннен қате тапсаңыз, бізге жазыңыз