Құралбаевтар отбасының айтуынша, көрші ауылдың алты жігіті Азизді елсіз жерге апарып, азаптаған .

Түркістан облысында тағы бір қанды қылмыс тіркелді. Мақтарал ауданының 30 жастағы тұрғыны Азиз Құралбаев бірнеше жас жігіттің соққысына жығылып, ауыр халде ауруханаға түскен. Ол үш ай бойы жансақтау бөлімінде ес-түссіз жатып, қайтыс болды, деп хабарлайды 31-арнаның "Информбюро" ақпараттық бағдарламасы.

Марқұмның жақындарының айтуынша, күдіктілер оны аяусыз ұрып-соғып қана қоймай, денесін темекімен күйдіріп, аузына күштеп арақ құйған.

"Азиздың сау жері жоқ еді. Беті ісіп кеткен, көзіне қан ұйыған. Жамбасы көгеріп, бірнеше жерінен темекімен күйдірген. Миы қатты зақымданды. Дәрігерлер ашпасақ, қысымнан адам өледі деді", – дейді марқұмның ағасы Альмир Құралбаев.

Оқи отырыңыз: Енді қарызы бар азаматтарды әуежай мен вокзалдағы камералар да таниды

Құралбаевтар отбасының айтуынша, көрші ауылдың алты жігіті Азизді елсіз жерге апарып, азаптаған. Ауыр жарақат алған ол есін жимастан көз жұмды. Туыстары тергеу барысына көңілі толмай отыр.

"Алтау жабылып ұрған. Бірақ төртеуі ғана қамауда, екеуі бостандықта жүр. Оларды қалай куәгерге айналдырғанын түсінбеймін. Жәбір көрген адамды темекімен күйдіргендерді неге тек бұзақылық бабымен тергеп жатыр?" – дейді Альмир Құралбаев.

Айтуларынша, қайғылы жағдай қыз үшін жанжалдан шыққан. Азиз көрші ауылдың аруымен сөйлесіп жүрген. Бұған қызға қызыққан жастар қарсылық танытып, ақыры жанжал қанды оқиғаға ұласқан.

Ақпан айында басталған қылмыстық іс аяқталып, сотта төрт адам "денсаулыққа қасақана ауыр зиян келтіру" және "бұзақылық" баптары бойынша жауап беріп жатыр.