Атырауда мұнай компаниясының 46 жастағы менеджері Бибігүл Шпанованың өліміне қатысты істің үкімі жарияланды, деп хабарлайды KAZ.NUR.KZ Атырау облыстық соттарының баспасөз қызметіне сілтеме жасап.

Тергеу мәліметтеріне сәйкес, жәбірленуші 2022 жылы Атырауда пәтер сатып алып, сантехник маманымен танысқан. Сантехник жәбірленушімен алдағы жөндеу жұмыстарын талқылау кезінде жәбірленушінің сеніміне кіріп, оның тұрақ орнын сатып алу жоспары туралы білген. Сол кезде сантехникте алаяқтық қылмыстық құқық бұзушылыққа бару туралы ой туған. Ол жәбірленушіні ұйым қызметкерлері арқылы тұрақ орнын жеңілдікпен сатып алуға көмектесетініне сендіріп, одан 400 мың теңге алдын-ала төлем алып, өзіне иемденген. Кейін жәбірленуші оған келісім туралы бірнеше рет есіне салған.

Бір жылдан кейін ол тағы да сантехник маманына қоңырау шалып, тұрақ орны туралы есіне салып, мәселе шешілмеген жағдайда шағым түсіретінін ескерткен. Әйел өзінің жүктілігі және одан әрі күтудің мүмкін еместігі туралы хабарлаған. Осыдан кейін сантехник арызды рәсімдеу сылтауымен оған мас күйінде келген. Алаяқтықты жасыру үшін ол маска киіп, пышақпен қаруланып, жәбірленушіні зорлап, аса қатыгездікпен өлтірген.

Кейін ол пәтерді тінтіп, сейфті ашып, қомақты ақша мен зергерлік бұйымдарды ұрлап, көлік пен ұялы телефонды иемденген. Жалпы материалдық шығын 13 млн теңгеден асқан.

Сотта прокурор мен жәбірленушілер тарап сотталушыны кінәлі деп танып, оған өмір бойына бас бостандығынан айыру жазасын тағайындауды сұрады.

Қорғаушы тарап Қылмыстық кодекстің 190, 120, 200, 188-баптары бойынша ақтап, жеңіл жаза тағайындауды сұрады.

Сотталушының кінәсі куәлердің, жәбірленушілердің айғақтарымен, сараптама қорытындыларымен, бейнежазбалармен, оқиға орнын қарау хаттамаларымен және заттай дәлелдемелермен расталды.

Сот сотталушыға жаза тағайындау барысында жеңілдететін мән-жайларды анықтамады. Сот қылмыстың мас күйінде жасалуын — ауырлататын мән-жай ретінде таныды.

Сотталушы айыптаудың барлық эпизоды бойынша кінәлі деп танылды. Оған өмір бойына бас бостандығынан айыру жазасы тағайындалды. Жәбірленушінің пайдасына материалдық және моральдық залал өндірілді.

Сот үкімі заңды күшіне енген жоқ.

Мәтіннен қате тапсаңыз, бізге жазыңыз