Ерлі-зайыптының артында төрт бала қалды.

Түркістан облысының Сайрам ауданында ерлі-зайыптының жантүршігерлік өлімі тіркелді. Ер адам отасқан жұбайын азаптап өлтіріп, артынша дәретханада өз-өзіне қол салған. Қайғылы жағдайды олардың төрт баласы таңертең мектепке жиналып жатқанда көрген. Қазір жетім қалған балалар балалар үйіне уақытша орналастырылды, деп хабарлайды 31-арнаның "Информбюро" ақпараттық бағдарламасы.

Қанды оқиға болған үйде қара жамылған Мырқадиевтер отбасы үш күннен бері қаралы күйде. 13 жастағы қыз таңертең анасының қанға бөккен денесін көріп, шырылдап айғай салған. Оның дауысын естіген көршілер көмекке келген.

"Басы қан-қан болып жатты. Балта ма әлде басқа нәрсемен ұрғанын білмедік. Кейін тексергенде балғаны тауып алдық. Әйелін басынан балғамен ұрып өлтіріпті. Ал өзі дәретханада асылып тұр екен", – деді марқұмның ағасы Мырзакерім Мырқадиев.

Туыстарының айтуынша, марқұм әйелдің денесінде сау жер қалмаған.

"Шаштары жұлынған, қанға қатып қалған. Арқасына дейін құм кіріп кеткен. Жудық, тазаладық, бірақ түрін тану мүмкін емес еді. Денесі түгел жарақаттанған", – деді марқұмның әпкесі Махаббат Мырқадиева.

Оқи отырыңыз: Қайтарылған активтер: Қарағанды облысында медициналық пункт ашылды

Түнгі бірлер шамасында болған қанды оқиға таңғы сағат алтыда белгілі болған. Үйдің тұңғышы анасын көрген соң әкесін іздеп, дәретханадан оның мәйітін тауыпты. Ер адам өз әрекетінің себебін аудиожазбада қалдырған.

"Мен әйеліме қол жұмсадым. Себебі зина көбейіп кетті деді. Маған да айтты, қарындасың бөтен кісімен жүр деп. Содан кейін сондай қадамға бардым деді. Қызғаныштан болған жағдай ғой", – деді марқұмның ағасы Мырзарахым Мырқадиев, күдіктінің соңғы жазбасын келтіре отырып.

Алайда марқұм әйелдің жақындары күйеу баланың айтқанын негізсіз өсекке балап отыр.

"Алдын ала мәліметтерге сәйкес, ер адам үй жағдайында жұбайына дене жарақатын салған. Соның салдарынан әйел қайтыс болған. Кейін күдікті қылмыстың себебін сипаттаған аудиожазба қалдырып, өзін-өзі өлтірген", – деді Түркістан облысы полиция департаментінің баспасөз қызметі.

Оқи отырыңыз: Әзербайжанда туыстар арасындағы некеге шектеу енгізілген соң, үйлену тойлары азайды

Ерлі-зайыптының артында төрт бала қалды: тұңғышы 13 жаста, кенжесі үш жарымда. Туыстарының сөзінше, ер адамның тұрақты жұмысы болмаған, ал әйелі бала күтімімен үйде отырған.