Англияның Ливерпуль қаласында World Boxing әлем чемпионатында ағайынды Махмұд (55 келі) пен Төрехан Сабырхан (70 келі) топ жарып, ел қоржынына екі алтын медаль түсірді. Қос бірдей чемпионның анасы Меңтай Әсілова Jibek joly телеарнасындағы "Бүгін LIVE" бағдарламасына сұхбат беріп, жеңістен алған әсерін бөлісті, деп хабарлайды KAZ.NUR.KZ.

Ең алдымен Әсілова балаларын қолдаған халыққа алғыс айтты.

"Балаларамыздың жетістігіне қуанамыз. Бұдан да биік белестерді бағындыруына тілекшіміз. Осы жарысқа кеткенде екі баламның да чемпион болып келеріне сендім. Махмұд бірнеше жыл жарыстарға қатысып келеді. Ал Төрехан алғаш рет ересектер санатына ауысып, бірінші жекпе-жегіне қатысты. Оның қарсыластары да әлдеқайда үлкен, анағұрлым тәжірибелі. Телефонмен сөйлескенде "Махмұд саған сенеміз, мына Татошқа да (Төрехан – ред.) ағалық ақылыңды айтып, рингке қалай шығуды айтып отыр" дедік”, – дейді Меңтай Әсілова.

Чемпиондардың анасы ұлдарының жекпе-жегін ұзақ қарай алмайтынын жеткізді.

"Кешегі финалға отбасымызбен, туыстарымызбен жиналдық. Бірақ тікелей қарауға жүрегім дауаламайды, екінші бөлмеде үй ішімнің даусынан-ақ біліп отырамын. Бөлек бөлмеде ұлдарымның тілеуін тілеп отырамын. Ал қазір қос бірдей ұлым чемпион атанған соң әсерімді сөзбен айтып жеткізе алмаймын, мұның бәрі жүректе сақталатын сәттер. Барлық анаға осындай қуанышты сезім тілеймін", – дейді Әсілова.

Әлеуметтік желіде Төреханды иығына салып көтеріп жүрген Махмұдтың әсерлі видеосы тараған еді. Олар отбасында бес ағайынды, бесеуі де бір-біріне қамқор әрі бауырмал болып өскен.

"Біздің бір қыз, төрт ұлымыз бар. Бәрі де бір-біріне жанашыр, мейірімді болып өсті. Әлі күнге дейін бір-бірін қолдап жүреді. Отбасымызда алған үлгілері лайым осылай жалғасқанын қалаймын. Енді ұлдарымның 2028 жылы Олимпиада чемпиондары болуын тілеймін", – деді мерейлі ана.

Айта кетейік, әлем біріншілігіне 68 елден 540 боксшы қатысты. Қазақ спортшылары 7 алтын, 1 күміс және 2 қола жеңіп алып, жалпы есепте үздік атанды және тарихи жеңіс сыйлады.

Мәтіннен қате тапсаңыз, бізге жазыңыз