Тиісті өтінішпен сотқа Спорт министрлігінің өкілі жүгінді.

Блогер Эльмира Төлегеноваға қатысты әкімшілік істі қылмыстық іс ретінде қарастыру ұсынылды. Бұл туралы Спорт министрлігінің құмар ойындар мен лотереяны реттеу комитетінің өкілі Әбділ Балтатегі сот отырысында мәлімдеді.

Оның айтуынша, іс қарау барысында әкімшілік өндіріс шеңберінде жауап бере алмайтын бірқатар сұрақ туындаған.

"Мысалы, "Zhana Business" ЖШС курстарының нақты құндылығы қандай? Шын мәнінде қандай да бір қауымдастық бар ма? Бұл курстардың шынайы бағасы қанша? Жеңімпазды анықтау неге лототрон арқылы тікелей эфирде емес, автоматтандырылған бағдарламаға жүктелген? Бағдарламалық жасақтамада қандай алгоритм жазылған? Мұндай сұрақтар Төлегенованың әрекеттерінде алаяқтық немесе заңсыз кәсіпкерлік сияқты қылмыстық құрам бар екенін көрсетеді", – деді Балтатегі.

Осыған байланысты ол соттан Төлегеноваға қатысты Әкімшілік кодекстің 445-1-бабы бойынша істі тоқтатып, материалдарды сотқа дейінгі тергеу органдарына жолдауды сұрады.

Бұған дейін Балтатегі Төлегенованың "курстарды сату үшін ұтыс ойыны өткіздік" деген уәждерін лотерея фактісін жасыру әрекеті деп атаған еді.

Оқи отырыңыз: Жапонияда қарттар саны тарихи рекордқа жетті

Өз кезегінде Эльмира Төлегенова тағылған айыппен келіспейтінін мәлімдеді. Оның айтуынша, ұтыс ойыны мен "бақыт барабаны" жеке Instagram парақшасында емес, өзі құрылтайшысы болып табылатын "Zhana Business" ЖШС сайтында өткізілген.

Блогердің адвокаты Олег Чернов істі тоқтатып, комитет жасаған хаттаманы дәлел ретінде мойындамауды сұрады.

Судья Әкерке Бектұрғанова шешім қабылдау үшін кеңесу бөлмесіне кетті. Үкім бүгін, 15 қыркүйек күні сағат 16:00-де жарияланбақ.