Алматы қаласындағы ең көне медициналық ұйым – №1 қалалық перзентхананы жаңа босандыру орталығы салынады. Жаңа перзентхана 155 төсекке арналған, деп хабарлайды Денсаулық сақтау министрлігіне сілтеме жасаған KAZ.NUR.KZ.

Ведомтствоның мәліметінше, 1938 жылы салынған ғимарат көптен бері мегаполис тарихының бір бөлігіне айналған. Ондаған жыл ішінде мұнда жүздеген мың алматылық дүниеге келген, ал көптеген отбасылар үшін бұл перзентхана ең әсерлі естеліктермен байланысты.

Бірақ 87 жыл жұмыс істеген ғимарат қауіпсіздік пен медицинаның заманауи талаптарына сай келмейді. Сондықтан Бөгенбай батыр көшесінің бойындағы ескі ғимаратты бұзып, оның орнында ауданы 10 мың шаршы метрден асатын заманауи медициналық кешен салу туралы шешім қабылданған.

Денсаулық сақтау министрі Ақмарал Әлназарова Алматыға жұмыс сапары барысында қалалық денсаулық сақтау басқармасының басшысы Марат Пашимовпен жаңа ғимарат салу жобасы ұсынылған медициналық ұйымды аралаған.

Жаңа перзентхана 155 төсекке арналған. Кең және заманауи палаталар аналар мен жаңа туған нәрестелер үшін жайлылықты қамтамасыз етеді.

"Қабылдау бөлімшесінде жедел операциялық бөлме пайда болады — бұл қымбат уақытты жоғалтпай өмірді сақтауға мүмкіндік беретін шешім. Операциялық бөлмелердің саны екіден төртке дейін артады, бұл көмектің қолжетімділігін айтарлықтай арттырады", — делінген хабарламада.

Жаңа корпус іске қосылғаннан кейін медициналық көмек көрсету саны жылына 9-дан 11 мыңға дейін артады, ал босандыру саны 5-тен 7 мыңға дейін өседі деп күтіліп отыр.

Құрылыс кезінде перзентхана жұмысын жалғастырады: барлық бөлімше Сейфуллин даңғылындағы "А" блогына уақытша ауыстырылады.

Мәтіннен қате тапсаңыз, бізге жазыңыз