Мәдениет және ақпарат министрінің мәліметінше, Қазақстанда ажырасу көрсеткіші төмендеу үрдісін көрсетуде. Соңғы бес жылда олардың саны шамамен 16%-ға қысқарған: 2020 жылы 48,2 мың жағдай тіркелсе, 2024 жылы 40,5 мыңға дейін азайды, деп хабарлайды Zakon.kz.

Бұл ерлі-зайыптылардың жауапкершілігі артып, отбасын сақтап қалуға деген ұмтылысының белгісі екенін министр өз құттықтауында атап өтті.

“Қуантатыны — елімізде отбасы институты нығая түсуде. Социологиялық деректерге сәйкес, қазақстандықтардың басым бөлігі үшін (85–89%) ерлі-зайыптылар мен балалар арасындағы сүйіспеншілік, сыйластық және түсіністік басты құндылық болып қала беруде. Дәл осы құндылықтар берік әрі бақуатты отбасының негізін қалайды”, — деп жазды Аида Балаева.

2019 жылдан бастап Жоғарғы сотпен бірлесіп, кәмелетке толмағандар ісі жөніндегі соттарда “Бақытты отбасы” жобасы іске асырылып келеді. Ол ажырасу істеріндегі дауларды шешуге бағытталған. Жоба аясында психологтар, заңгерлер, медиаторлар және әлеуметтік қызметкерлер кеңес береді.

2024 жылы істердің 37,5%-ы тараптардың татуласуымен аяқталған (2023 жылы — 33,1%). Бұл жобаның тиімділігін көрсетеді деп санайды министр.

Сонымен қатар, жаңадан отау құратын жастарға арналған қарым-қатынасты үйлестіруге бағытталған оқу бағдарламаларына ерекше көңіл бөлінуде.

Балаларды тәрбиелеудегі жауапкершілікті арттыру үшін “Ата-аналар академиясы” жобасы жүзеге асырылып жатыр.

Азаматтарға қолдау көрсетуде Отбасын қолдау орталықтары (ОҚО) да маңызды рөл атқарады. Оларға жыл ішінде 40 мыңнан астам адам жүгінген.

“Ең өзекті мәселелер бойынша 15 мыңнан астам кеңес берілді, тағы шамамен 4 мың азамат кешенді сүйемелдеуге алынды”, — деп жазды Балаева.

Сөз соңында министр қазақстандық отбасыларға амандық, сүйіспеншілік пен татулық тіледі.