ІІМ Ұлттық ұлан борты жол апатынан қаза тапқан азаматтардың туыстарын Маңғыстау облысына жеткізу үшін жіберілді. Бұл туралы Ішкі істер министрлігіне сілтеме жасаған KAZ.NUR.KZ хабарлайды.

Ведомствоның баспасөз қызметінің мәліметінше, бортта жол-көлік оқиғасынан қаза тапқандардың туыстары бар. Олар марқұмдардың жеке тұлғасын анықтау және басқа да қажетті рәсімдер үшін бара жатыр.

"Борт қаза тапқандардың денелерін өз аймақтарына жеткізу үшін де пайдаланылады", — делінген хабарламада.

Қаза тапқан жолаушылардың ішінде бес әйелдің Қарағанды облысынан, біреуі Астана қаласынан екені анықталған.

Хабарламада бұл шара марқұмдардың отбасыларына жедел көмек көрсету, жеке тұлғасын анықтау рәсімдеріне қатысу, оларды тасымалдау және жерлеуді ұйымдастыру жұмыстарын оперативті шешу мақсатында ұйымдастырылғаны айтылған.

Айта кетелік, 10 адам көз жұмған жол апаты 11 қыркүйекте Маңғыстау облысы Қарақия ауданы Сенек елді мекенінен 90 шақырым жерде болған.

Алдын ала мәліметтер бойынша, Toyota Hiace маркалы автокөліктің жүргізушісі рөлге ие бола алмай, салдарынан көлік жол шетіне аударылып кеткен.

Жол апаты салдарынан жолаушылардың сегізі оқиға орнында, тағы екі адам ауруханаға барар жолда қайтыс болған. Жүргізуші мен екі жолаушы түрлі жарақаттармен ауруханаға жатқызылған.

Кейін белгілі болғандай, жолаушылар қасиетті Бекет-Атаға қажылық сапарға шыққан. Барлығы еліміздің әртүрлі өңірлерінен келген Қазақстан азаматы.

Жол-көлік оқиғасына байланысты қылмыстық іс қозғалды. Сондай-ақ ішкі істер министрінің тапсырмасымен жедел штаб құрылып, министр қылмыстық істің тергеу барысын бақылауына алды.

Қазіргі уақытта тергеу аясында жүргізушінің іс-қимылы, көліктің техникалық жағдайы, маршрут және тасымалдау шарттары тексерілуде.

Сонымен қатар жол апатынан аман қалған үш адамның жағдайы белгілі болды.

Мәтіннен қате тапсаңыз, бізге жазыңыз