Семейде полиция қызметкерлері қайғылы жағдайдың алдын алды. Олар кәріз құдығына түсіп, есін жоғалатқан ЖЭО қызметкерлерін құтқарып қалған, деп хабарллайды Абай облыстық ПД-ға сілтеме жасаған KAZ.NUR.KZ.

Полицияның мәліметінше, оқиға, 10 қыркүйекте таңертең болған. Сағат 09:00 шамасында облыстық сот ғимаратының маңында ЖЭО-ның үш қызметкері кәріз құдығына түскен. Олардың екеуі бірден есінен танып қалған.

Алғашқылардың бірі болып көмекке ҚР ІІМ Мамандандырылған күзет қызметі басқармасының қызметкерлері – полиция старшинасы Аслан Какенов, полиция аға сержанты Ерзат Баймулаев, полиция аға сержанты Айгерім Мұхтарбекова және полиция кіші сержанты Тұрсынбек Айтқазы жеткен.

Полиция старшинасы Какенов дереу саты алып келіп, ер адамдардың біріне сыртқа шығуына мүмкіндік берген. Ал полиция аға сержанты Айгерім Мұхтарбекова жедел жәрдем шақырған.

"Ерлік көрсеткен полиция аға сержанты Ерзат Баймулаев өз өміріне қауіп төнсе де, арнайы қызметтердің келуін күтпестен әрекетке көшті. Ол өзін арқанмен байлап, противогаз киіп құдыққа түсті.

Жоғарыда әріптестері Какенов пен Айтқазы оны сақтандырып тұрды. Нәтижесінде естен танған екі жұмысшы жер бетіне шығарылды", — делінген хабарламада.

Арада санаулы минуттардан кейін оқиға орнына дәрігерлер келіп, зардап шеккендерге алғашқы медициналық көмек көрсеткен. Қазір олардың өміріне еш қауіп жоқ.

Мәтіннен қате тапсаңыз, бізге жазыңыз