Айыпталушы кінәсін мойындады.

Ақтөбеде 69 жастағы дәрігердің өліміне қатысты іс бойынша сот отырысы өтіп жатыр, деп хабарлайды inbusiness.kz сайты "Диапазон" басылымына сілтеме жасап.

Жантүршігерлік оқиға биыл мамыр айында болған. Нефролог-дәрігер Абай Айсағалиевті өлтірді деген күдікпен 31 жастағы қала тұрғыны ұсталған.

Бүгін қылмыстық істер жөніндегі мамандандырылған сотта бұл іске қатысты сот отырысы басталды. Мемлекеттік айыптаушы іс материалымен таныстырды.

Белгілі болғандай, айыпталушы 31 жастағы ер адам диализ орталығында жұмыс істеген және марқұм Абай Айсағалиевпен таныс болған. Ол дәрігердің жалғыз тұратынын және банк шотында қомақты қаражаты барын білген. Дәрігер күдіктіден планшетке банк қосымшаларын орнатып беруін сұраған. Айыпталушы марқұмның банк шоттары, ПИН-кодтары мен құпиясөздері туралы мәліметті біліп алған.

"19 мамырда ол Айсағалиевтің Астанаға көзіне ота жасатуға баратынын білген. 24 мамырда дәрігер Ақтөбеге қайтып оралған. 25 мамырға қараған түні айыпталушы оның үйіне барады. Үй иесі есікті ашқан. Айыпталушы ас үйде дәрігерді 3 рет пышақпен ұрып, ол құлаған соң балтамен 2 рет басынан ұрған. Кейін денесін скотчпен байлап, басына пакет кигізіп, мұздатқышқа салған. Ал мұздатқыштың есігін скотчпен орап тастаған. Кейін дәрігердің телефонын, планшетін, ноутбугын, банк картасын рюкзакқа салып алып кеткен. Банкоматтан марқұмның шотынан ақша алған. Бұл кезде ол интернеттен сатып алған силикон масканы киіп жүрген. 27 мамыр күні хабарландыру арқылы жүк көлігіне тапсырыс беріп, мұздатқышты №8 гараж кооперативіне жеткізуді сұраған. Жүк көлігі жүргізушісі мен жұмысшыларға ішінде ет барын айтқан. Кейін мұздатқышты Кереев көшесі, 4 үйге қайта көшіріп апарған", – делінген хабарламада.

Айыпталушы марқұмның шотынан 5 268 000 теңге шешіп алған, ал жалпы келтірілген шығын 7 234 000 теңгеге жеткен.

Алдын ала сот отырысында айыпталушы кінәсін мойындап, жасаған ісіне өкінетінін айтқан.

"Менде ешқандай пайда күнемдік ой болған жоқ. Қылмыс абайсызда жасалды. Менің әрекетімді ҚК 99-бабы 1-бөлігіне ауыстыруды, іске алқа билерді қатыстыруды сұраймын. Марқұмның жақындарынан кешірім сұраймын", – деді айыпталушы.