Ушудан ұлттық құрама спортшылары бүгін Алматыға келіп жетті.

2025 жылғы 1–7 қыркүйек аралығында Бразилияда (Бразилиа қ.) өткен УшуданӘлем чемпионаты Қазақстан спорты тарихындағы айтулы оқиғалардың бірі болды. Әлемнің 90 елінен келген үздік спортшылар қатысқан байрақты бәсекеде ұлттық құрама спортшылары жүлделі орындарға ие болды.

100 келіден жоғары салмақ дәрежесінде сынға түскен Нұрсұлтан Тұрсынқұлов алтын медаль жеңіп алып, Қазақстан тарихында алғаш рет Ушу Саньда бойынша Әлем чемпионатының жеңімпазы атанды. Бұл жетістік ұлттық құрама қоржынына 28 жылдан кейін түскен алғашқы алтын жүлде болып тіркелді.

Финалда Тұрсынқұлов Мысыр елінің өкілі Ахмед Шалабимен кездесіп, қарсыласынан 30 келіге жеңіл болғанына қарамастан сенімді жеңіске жетті. Бұл жекпе-жек қазақстандық спортшының табандылығы мен шеберлігінің айқын көрінісі болды.

70 келі салмақ дәрежесінде ел намысын қорғаған 18 жастағы Алижан Аблагатов та сәтті өнер көрсетті. Жас спортшы алғашқы айналымда Гонконгтан келген қарсыласын, кейін Мысыр өкілін және жартылай финалда Түрікменстан спортшысын жеңіп, финалға жолдама алды. Шешуші кездесуде Алижан Иран спортшысына есе жіберіп, Ушу Саньдадан ересектер арасындағы Әлем чемпионатының күміс жүлдегері атанды.