Бұл бағдарламалар бойынша 2022 жылдан бері төлем мөлшері өзгермеген.

Сенатор Бибігүл Аққожина депутаттық сауалында "Жастар практикасы" және "Алғашқы жұмыс орны" мемлекеттік бағдарламаларына қатысушылардың жалақысы төмен екенін айтты, деп хабарлайды inbusiness.kz сайты.

Сенатордың сөзінше, бұл бағдарламалар бойынша 2022 жылдан бері төлем мөлшері өзгермеген, бұл 30 АЕК-ке тең. Бұл ретте қатысушыларға "қолға түсетін" төлемнің нақты мөлшері – 90 511 теңге.

"Жастар, әсіресе, әлеуметтік осал санаттағы және ата-анасының қолдауы жоқ түлектер қазіргі төлем деңгейінде тұрғын үй мен тамақтану шығындарын объективті түрде жаба алмайды. Нәтижесінде көптеген адамдар қатысудан бас тартып, бейресми жұмыс іздеуге мәжбүр", — деді Бибігүл Аққожина.

Депутат төмен жалақы мемлекеттік жастар саясатының мақсатына қайшы келетінін атап өтті. Бибігүл Аққожина келтірген мәліметке сәйкес, 2024 жылы 9 мың 600 адам "Алғашқы жұмыс орны" жобасы бойынша жұмысқа орналастырылды, оның ішінде 4 мың 200 адам қатысуды аяқтады. Тұрақты жұмысқа 2 мың 200 адам орналастырылды. Жастар практикасы бойынша көрсеткіштер сәл жоғары: 33 мың қатысушыдан 12 мың 600 адам аяқтады, кейін 7 мың 400 адам тұрақты жұмысқа орналасты.

"Бүгінгі таңда инфляциялық құбылыстарға орай "Жастар практикасы" және "Алғашқы жұмыс орны" жобаларына қатысушылардың жалақысын арттыру мүмкіндігін, жастар үшін аталған жобалардың тиімділігі мен тартымдылығын арттыру қажеттілігін ескере отырып, қарастыруды сұраймыз", — деді сенатор.