Ақтөбеде Президент Жолдауындағы міндеттерді жүзеге асыру жолдары талқыланды. Өңір тұрғындары стратегиялық маңызды құжатта айтылған ой, батыл бастамаларды қолдап отыр. Жалпы облыста жыл басынан бері экономиканың барлық саласына 590 млрд теңге тартылды. Бұл былтырмен салыстырғанда 52 пайызға көп.
Алдағы бес жылда төрт жарым трлн теңгенің 93 инвестициялық жобасы жүзеге асады. Облыс әкімі Асхат Шахаровтың төрағалығымен өткен жиында алдағы жұмыс жоспары құрылды.
Президент өз Жолдауында инвестиция тарту, тау-кен және қайта өңдеу өнеркәсібін дамыту керектігін айтты. Бұл ретте Ақтөбе облысында газ-химия кешені, болат өндірісі, рельс дәнекерлеу зауыты, сәбилерге арналған тағам дайындау және жылу оқшаулағыш материалдарын шығару жобалары жүзеге асырылып жатыр.
Цифрландыру – заман талабы
Мемлекет басшысы қойған тағы бір міндет — Қазақстан алдағы 3 жылда цифрлы мемлекетке айналуы тиіс. Мысалы, Ақтөбе облысында құрылыс саласы цифрландырылды. Мәселен, ақпараттық портал арқылы 430 жобалық-сметалық құжаттың қорытындысы шығарылып, 4 мыңға жуық техникалық қадағалау есебі қабылданды.
Аслан Жарасбаев, облыстық Құрылыс, сәулет және қала құрылысы басқармасы басшысының орынбасары:
- «Е — құрылыс» бағдарламасына 5 нысанымыз еніп отыр. Алдағы уақытта да осы жаңа нысандардың барлығы осы платформаға енгізілетін болады. Бұл бізге не береді? Бұл ең біріншіден сыбайлас жемқорлық тәуекелдерін болдырмайды.
Өңірде көлік-логистика саласын дамыту үшін әуежайда арнайы экономикалық аймақ құрылды. Қазір онда заманауи жанармай құю кешені мен қоймалар салынып жатыр.
Авторлары: Айдарбек Айтмұхамбетұлы, Наталья Салькова, Айнадин Молдабеков
