АҚШ-та украин босқынын қатыгездікпен өлтіру ісі елді дүр сілкіндірді.

Бұл қылмысқа қатысты пікір білдірген Дональд Трамп күдіктіні өлім жазасына кесуді талап етті, деп жазады inbusiness.kz сайты.

Оқиға 22 тамызда Солтүстік Каролина штатының Шарлотт қаласында болды. Теміржол пойызында 23 жастағы украин босқыны Ирина Заруцкаға 34 жастағы Декарлос Браун бірнеше рет пышақ салған. Жәбірленуші оқиға орнында көз жұмды.

Күдікті ұсталып, алдымен бірінші дәрежелі кісі өлтіру айыбымен қамауға алынды. Кейін федералды прокурорлар оған қоғамдық көлікте адам өлтіру бойынша айып тақты. Бұл қылмыс АҚШ заңдары бойынша өмір бойына бас бостандығынан айыруды немесе өлім жазасын қарастырады.

Президент Дональд Трамп әлеуметтік желідегі парақшасында бұл қылмысты "қорқынышты әрі кешірілмес іс" деп атап, күдіктіге ең ауыр жаза қолданылуы қажет екенін айтты.

"Бұл әдемі жас әйел Америкаға бейбіт өмір іздеп келген. Оның өмірін қасақана қиған адамға тек өлім жазасы лайық", – деп жазды ол.

Оқиға АҚШ-та қылмыс пен қоғамдық қауіпсіздік мәселесін қайта көтерді. Республикалықтар демократтарды қылмысқа қарсы саясатта әлсіздік танытып отыр деп айыптады. Ал жергілікті билік қоғамдық көліктегі қауіпсіздікті күшейту шараларын қолға алды.

Қазір күдіктінің ісі федералды сотта қаралуда. АҚШ Әділет министрлігі өлім жазасы мәселесін сотқа дейінгі тергеу барысында шешпек.