Премьер-министр Олжас Бектенов Ұлттық экономика министрлігіне бес күн ішінде Алатау қаласына арнайы мәртебе беру туралы жарлықтың жобасын әзірлеп, Үкіметке енгізуді тапсырды, — деп хабарлайды Massaget.kz тілшісі.

Құжатта қаланың ерекше мәртебесі және оның Үкіметке тікелей бағынуы ескерілуге тиіс.

"Ұлттық экономика министрлігіне бес күн ішінде Үкімет аппаратына "Алатау қаласы туралы" Президент жарлығының жобасын пысықтап, енгізу тапсырылсын", – деді Олжас Бектенов.

Сондай-ақ, премьер-министр үш ай ішінде Алатаудың құқықтық режимі мен басқару жүйесіне қатысты заңнамалық актілердің жобаларын әзірлеуді тапсырды.

Еске салайық, бұған дейін Алатау қаласына ерекше мәртебе берілетіні хабарланды. Бұл туралы Президент Қасым-Жомарт Тоқаев Қазақстан халқына жолдауында мәлімдеді.

Өзекті жаңалықтарды өз уақытында оқу үшін Facebook парақшамызға жазылыңыз!