Қытайдан атпен шыққан ерлі-зайыпты Қуанбек Түсіпханұлы мен Жайна Еркінқызы Алматы іргесіне жетті. Бүгіннің Төлегені мен Жібегі атанған жұп алыстағы Тарбағатайдан Арқадағы Астананы көруге келе жатыр. Қуанбек пен Жайнаның ат үстінде жүргеніне бір ай бопты. Ұлттық дәстүрді дәріптеген саяхатшылармен Аршын Кемелжан кездесіп, жөн сұрасып қайтты.

Қуанбек пен Жайна Қытайдан Қазақстанға 8 тамыз күні шығыпты. Тарбағатай аймағынан Қорғас бекетіне дейін 900 шақырым жүрген. Оларды ағайын-туыс пен екі ұлы шекараға дейін шығарып салған. Кеден талабына сай өз аттарын арғы бетте қалдырған. Қорғаста басқа жылқыларға мінген.

Қуанбек Түсіпханұлы, саяхатшы:

- Ауылымыздан шығып, Қорғас шекарасына жеткенше екі ұлым екі атпен бізді шығарып салды. Біз ойлағанбыз, бір-екі күннен кейін бұлар да шаршап қалатын шығар деп. Бірақ қасымызда жүріп, олар да сол 17 күн жолды сол аттың үстінде бізбен бірге тамамдап, оқу басталуы себепті ауылға қайтып кетті.

Қытайдан келе жатқан салт аттылар Алматы облысындағы Жармұхамбет ауылына дейін бір аптадан аса жүрген. Осында түнеп, аттарын тынықтырған соң Астана сапарына кірісті. Аттарды ерттеп, жолға қажетті азықтарын толықтырды. Ерлі-зайыптылардың өзгеше сапарының мақсаты – ұлттық дәстүрді дәріптеп, екі елдің арасындағы мәдени байланысты арттыру.

Қуанбек Түсіпханұлы, саяхатшы:

- Өзіміздің осындай кішкентай қимылымыз арқылы екі елдің арасындағы осындай бейбітшілік, тыныш, берекелі заманда сондай достығымыз бен мәдениетіміз арқылы екі елдің достығын бейнелейтін жүріс болса деп шыққанбыз.

12 жыл бұрын отау құрған жұп ұлттық дәстүрді бойына сіңіріп өскен. Ата кәсіптен нәсібін терген жастар жылқы малын көбейтумен айналысады екен. «Алматыға дейін шаршамай жеттік», — дейді Жайна Еркінқызы. Ағайынның қонақжайлығын көріп, риза болғанын да айтты.

Жайна Еркінқызы, саяхатшы:

- Қазақ еліне қарай өткен кезде алдымыздан қарсы алған кісілер болсын, осындай құрмет қылып, ақ баталарын беріп, апаларымыз шашуын шашып, әпкелеріміз де көптеген көмек жасап жатыр. Халықтың арасында той болып келе жатыр десек те болады. Көптеген қиыншылық бізге сезілген жоқ. Астанаға барып көрген жоқпыз, енді тұңғыш рет осы атпен кетіп бара жатырмыз. Маған өте қызық сезінеді, осы Астананы көруге асығамын.

Қуанбек пен Жайна ұлттық киім киіп, ат мініп ел аралауды 4 жыл бұрын бастапты. Олар алғаш рет Тарбағатай аймағынан шығып, Бейжіңге дейінгі 4000 шақырымды 74 күнде жүрген. Одан кейін Қытайда өткен 500 шақырымдық атты марафонға да қатысыпты. Ендігі сапары 2500 шақырымға жуық екен.

Аршын Кемелжан, тілші:

- Бүгінгінің Төлегені мен Жібегі атанған ерлі-зайыптылар Алматыдан Астанаға жолға шыққалы тұр. Алда 1250 шақырымдық алыс сапар. Ол үшін арнайы көк атпен күреңді тақымдаған. Аттарды зорықтырып алмас үшін Астанаға дейін 30 күн жол жүреміз деп отыр. Шамамен күніне 50 шақырымды жүріп өтпек.

Осылайша, Алматыдағы ағайынға аман-саулық тілеген саяхатшылар Астанаға бет алды. Ат-көлік аман болса қазанның басында жетеді. Астананы аралап, елдің арасында болып тыныққан соң Тарбағатайға көлікпен қайта қайтады.

Авторлары: Аршын Кемелжан, Айдос Қалиев