Болашақ ұстаздар – Қазақ ұлттық қыздар педагогикалық университтетінің 12 мыңнан астам студенті мен магистранттары Coursera, Huawei және Astana Hub платформаларындағы курстарды аяқтап, біліктілігін арттырды, деп жазады Egemen.kz.

2025 жылғы 8 қыркүйекте Мемлекет басшысы Қасым-Жомарт Тоқаев Қазақстан халқына арнаған Жолдауында «Қазақстан міндетті түрде цифрлық ел болуы керек» деп атап өтті. Сонымен бірге жасанды интеллектімен жұмыс істеу құзіретін қалыптастыру әлдеқайда ерте жастан, яғни мектеп қабырғасынан қолға алынуға тиіс екенін айтты.

«Менің тапсырмаммен 100 мыңға жуық студентті технологиялық жобаларға тартуды көздейтін Al-Sana бағдарламасы жүзеге асырыла бастады. Алайда жасанды интеллектімен жұмыс істеу құзіретін қалыптастыру әлдеқайда ерте жастан, яғни мектеп қабырғасынан қолға алынуға тиіс. Осыған орай бірқатар бастаманы жүзеге асырған жөн. Ең алдымен, мектеп оқушыларына арналған жасанды интеллект негіздері туралы бағдарлама және оқу материалдарын әзірлеу қажет. Ұстаздардың жасанды интеллект технологиясын меңгеру дағдысын да қалыптастыру керек болады», – деді Қасым-Жомарт Кемелұлы Тоқаев.

Қазақ ұлттық қыздар педагогикалық университтетінің Басқарма Төрағасы-Ректорының м.а. Суатай Сабит Құрманжанұлы оқу орны Президент тапсырмаларын толық қолдай отырып, жасанды интеллект саласында тың жобаларды жүзеге асырып келе жатқанын айтты.

«2024 жылғы 11 желтоқсанда Астана қаласындағы Astana Hub алаңында Мемлекет басшысы ресми таныстырған AI-SANA бағдарламасы еліміздің цифрлық трансформациясына жаңа серпін берді. Университет бұл бастаманы алғашқылардың бірі болып қолдап, білім, ғылым және стартап-экожүйені дамыту бағытында жүйелі жұмыстар атқаруда. Өткен оқу жылында QyzPU-дың 12 мыңнан астам студенті мен магистранттары Coursera, Huawei және Astana Hub платформаларындағы курстарды аяқтап, сертификаттар алды. Университеттің біліктілікті арттыру орталығында профессорлық-оқытушылық құрам үшін «Білім берудегі жасанды интеллект: негіздері және практикалық қолдану» курсы тұрақты түрде өткізіліп келеді. Тек соңғы екі жылда 400-ге жуық оқытушы осы курстан өтіп, өз тәжірибесінде AI технологияларын қолдана бастады» – деді ректордың міндетін атқарушы.

Сонымен қатар университетте жаңа білім беру бағдарламалары мен курстар оқытыла бастады. Барлық мамандыққа арналған «Жасанды интеллект негіздері» пәні енгізілді. «Қолданбалы жасанды интеллект» атты жаңа білім беру бағдарламасы ашылып, алғашқы студенттерін қабылдауды бастады. Университеттің инфрақұрылымына AI агенттер – «TalapkerQyzPU», «iHelpDesk», «Qujattyq kenes», «KitapOqy», «Avatar QyzPU» енгізілуде.

«Президент Жолдауындағы «Ұстаздардың жасанды интеллект технологиясын меңгеру дағдысын қалыптастыру қажет» деген сөзі біздің университеттің стратегиялық бағытымен толық үйлеседі. Біз жасанды интеллектіні білім беру жүйесіне енгізе отырып, болашақ мұғалімдерді жаңа дәуірдің талаптарына сай дайындаймыз. Қазақ ұлттық қыздар педагогикалық университеті Президенттің бастамаларын толық қолдай отырып, білім, ғылым және инновацияны тоғыстырған, жасанды интеллект дәуірінде жетекші оқу орны болуға дайын», – деп атап өтті Сабит Құрманжанұлы.