Бүгін Қазақстан Республикасының президенті Қасым-Жомарт Тоқаев "Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу" атты Қазақстан халқына жолдауын жариялады. Жолдауда елдің әлеуметтік-экономикалық дамуына, индустриялық-инновациялық серпінге және елдегі өзекті проблемаларды цифрлық өзгерістер арқылы шешуге баса назар аударылды.

"Мен Маңғыстау өңірінің тұрғыны ретінде президентіміздің ең бірінші көтерген өзекті мәселесінің бірі – Каспий теңізінің тартылуы болғанын ерекше атап өткім келеді. Бұл – біздің аймақ үшін ең күрделі әрі ұзақ жылдар бойы алаңдатып келе жатқан экологиялық мәселе. Мемлекет басшысы осы түйткілге арнайы тоқталып, теңізді сақтау бағытында нақты шаралар қабылданатынын айтты.

Сонымен қатар өңіріміз үшін қай уақытта да маңызды болып келген ауыз су тапшылығы мәселесі де жолдауда кеңінен қамтылды. Су тапшылығы – тек Маңғыстаудың ғана емес, бүкіл әлем елдерінің алдында тұрған ортақ мәселе. Президентіміздің жер асты суларын игеру жөнінде тапсырма бергені – ел үшін үлкен жаңалық. Бұл көп жылдан бері қозғалып келе жатқан, бірақ нақты шешімін таппай жүрген мәселе еді. Маңғыстауда жер асты суының мол қоры бар екенін ескерсек, бұл қадам ауыз су проблемасын түбегейлі шешуге жол ашады деп сенемін.

Жолдауда ауыл шаруашылығы саласы да назардан тыс қалмады. Аталған саланы дамытуға бұрын-соңды болмаған триллион теңге көлемінде қаржы бөлінетіні айтылды. Мемлекет басшысының қағазбастылықты жою, ауылда еңбек етемін деген азаматтарға нақты қолдау көрсету туралы тапсырмасы – ел ішінде еңбекке деген ынтаны арттырып, ауыл экономикасын жандандыруға үлкен серпін береді.

Президентіміз ұлттық өнер мен ұлттық спортты дамыту мәселесіне де ерекше тоқталды. Бұл – ұлттың рухани болмысын сақтаудың басты жолы. Ұлттық өнер мен спорт арқылы біз төл мәдениетімізді, дәстүрімізді, ұлттық кодымызды келер ұрпаққа жеткізе аламыз.

Президент жолдауында жұмысшы мамандарға құрметті арттыра түсу туралы айтты. Еңбек адамын қолдау, жұмысшы мамандықтарға деген құрметті арттыру, оларға лайықты жалақы төлеу маңыздылығына тоқталды. Бұл азаматтардың өндіріске жұмысқа келуіне зор мүмкіндік деп білемін. Мұнай-газ саласында еңбек ететін әріптестерінің атынан Мемлекет басшысының бастамаларын толық қолдайтынын айтып, бұл бағытта аянбай еңбек етуге дайын екенін жеткізді".

Мәтіннен қате тапсаңыз, бізге жазыңыз