Түркістан облысының Созақ ауданында 3 саябақ жаңғыртылып, тұрғындардың демалысына жағдай жасалды. Жөндеу және абаттандыру жұмыстары «Таза Қазақстан» акциясы аясында жүргізілді.

Бұқаралық спортты дамыту мақсатында балалар ойын алаңы мен ересектерге арналған спорттық құрылғылар орнатылды. Қазір ауылдықтар бос уақытында спортпен шұғылданып жүр.

Шолаққорған ауылындағы саябақ бір жылда адам танымастай өзгерді. Жергілікті билік қаржы бөліп, демалыс орнын қалпына келтірді. Бұрын шөп басып, тоз-тозы шыққан еді. Қазір адам қарасы үзілмейді. «Тіпті басқа ауылдардың тұрғындары да келеді», — дейді ауыл тұрғындары.

Қыдырбай Раманқұлов, зейнеткер:

- Жақын жерде «Таукент» деген елдімекен бар, кіреберіс жерде «Жарты төбе» деген ауыл бар. Сол жақын әкімшіліктер де келеді. Енді біз «Таза Қазақстанның» көшіне ілесіп, бұл жерде енді қанша адам келсе, сонша адам бұл жердің тазалығына жауап береді. Әкімшілік осындай жағдай жасағанан кейін оның тірлігін алға қарай алып баруға осы ауыл қариялары атсалысамыз.

Жолдасбек Талымұлы, зейнеткер:

- Қолымыз бос кезде осында келіп, спортпен айналысып, шынығып тұрамыз. Әсіресе жас балаларға телефонға үңіліп отыра бермей, бір мезгіл осында келіп, алысып-жұлысып ойнап, футбол ойнап, құрал-жабдықтармен айналысып жатады. Бұл өте жақсы болып тұр ауылымызға.

Салауатты өмір салтын ұстанғандар осы саябаққа жиналады. Балаларға арналып футбол және ойын алаңдары салынған.

Жансерік Елеусізов, оқушы:

- Мынау ойын алаңы күшті. Мұнда доп ойнайтын жер бар. Барлық балалар келіп жаттығу жасай алады, ойнайтын заттардың барлығы тегін. Мында заттар сатылады, ана алаңда үлкендер доп онады. Бізде осныда достарымызбен келіп футбол ойнаймыз.

Былтыр «Таза Қазақстан» акциясы басталғанда аудынның 12 ауылдық округіне қоқыс шығаратын трактор сатып алынды. Одан бөлек, трициклдармен қамтылған. Халықтың экологиялық мәдениетін көтеру да басты назарда,- дейді аудан әкімі.

Мұхит Тұрысбеков, аудан әкімі:

- Тазалаған емес, тазалықты ұстағанда ғана таза болады. Сол үшін барлық жиындарда, ауылдың ақсақалдарын, жастарды бәрін баладан бастап, үлкен қарияға дейін сол жұмыстарды жүргізсек, оның экологияға, денсаулыққа әсеріннің бәрін түсіндірсек, сонда ғана бұл нәтижесін береді. Барлық жерлерде үгіт-насихат жұмыстарын жүргізіп жатырмыз. Бірігіп жұмыс істегенде ғана нәтиже болады.

Биыл тағы бірнеше ауылдағы саябаққа күрделі жөндеу жүргізіліп, ойын алаңы мен спорттық жаттығу құралдары орнатылып жатыр.

Авторлары: Жандос Жұмабек, Ерболат Әбіш, Қуаныш Әбуов