Футболдан Қазақстан ұлттық құрамасы 2026 жылғы әлем чемпионатының іріктеу кезеңіндегі бесінші ойынында Бельгиядан ойсырай ұтылды.

Кездесу Брюссельде өтіп, алаң иелері 6:0 есебімен басым түсті, деп жазады inbusiness.kz сайты.

Бұл ойында Қазақстан құрамасының бас бапкері Әли Әлиев бірқатар өзгерістер жасады.

Қақпашы Темірлан Анарбековтің орнына Мұхаммеджан Сейсен алаңға шықты. Сондай-ақ, негізгі құрамда Ұлар Жақсыбаев, Серікжан Мужиков, Сұлтанбек Астанов пен Оралхан Өміртаев жасыл алаңға жіберілді. Ал Ян Вороговский, Әлібек Қасым, Нұралы Әліп, Рамазан Оразов және Ғалымжан Кенжебекке тағы да сенім артылды.

Матчтың алғашқы минуттарынан-ақ бельгиялықтар ойынды өз бақылауына алды. Қазақстан қорғаушылары мен қақпашы Сейсен бірнеше қауіпті сәтті қайтарғанымен, қарсылас қақпаға жол тапты. Алдымен 42-минутта Кевин Де Брёйне есеп ашса, араға екі минут салып Жереми Доку таблодағы көрсеткішті еселеді.

Екінші таймда да алаң иелері қарқыннан таймады. Николас Раскин (52’), Жереми Доку (60’) және Кевин Де Брёйне (84’) өздерінің екінші голдарын соқты. Ал 87-минутта Томас Мёнье нүкте қойды – 6:0.

Бұл жеңістен кейін Бельгия құрамасы турнир кестесінде 10 ұпай жинап, 2-орынға көтерілді. Топта көш басында 11 ұпайы бар Солтүстік Македония тұр. Уэльс 10 ұпаймен 3-орында, Қазақстан болса әзірге 3 ұпаймен 4-орында қалды. Лихтенштейн әлі де ұпай жинаған жоқ.

Осы турда Солтүстік Македония Лихтенштейнді 5:0 есебімен жеңген болатын.

Қазақстан құрамасы келесі ойынын 10 қазанда өз алаңында Лихтенштейнге қарсы өткізеді.