Көшу кезінде материалдық көмекке жүгінудің электронды форматы енгізілді.

Еңбек және халықты әлеуметтік қорғау министрі Светлана Жақыпова соңғы 3 жылда 6 мың отбасы еңбек күші тапшылығы бар өңірлерге қоныс аударғанын айтты, деп хабарлайды inbusiness.kz сайты Еңбек және халықты әлеуметтік қорғау министрлігіне сілтеме жасап.

Министрдің айтуынша, ерікті түрде қоныс аударуға жәрдемдесу шеңберінде жаңа қолдау шаралары енгізілді. Қоныс аударушыларға тұрғын үй сатып алу үшін экономикалық мобильділік сертификаты беріледі. Бұл – шамамен 4,5 млн теңге.

"Соңғы үш жылда 6 мың отбасы еңбек күші тапшылығы бар өңірлерге қоныс аударды. Олардың жартысынан көбі сертификат алды. Қабылдаушы өңірлерде жеке мобильді сүйемелдеу жүйесі жұмыс істейді. Биыл 6 мыңнан астам адам қызметтерді пайдаланды. Қоныс аударушылар үшін ауыл шаруашылығы мақсатында берілетін жер учаскелерін конкурстан тыс тәртіппен алу құқығын, сондай-ақ материалдық көмекті есепке алу үшін ашық шоттардан өндіріп алуға тыйым салуды көздейтін түзетулер қабылданды. Көшу кезінде материалдық көмекке жүгінудің электронды форматы енгізілді. Жаңа механизм іске асырылған сәттен бастап, "қандас" мәртебесін 13 мың этникалық қазақ алды", – деді ведомство басшысы.

Ведомство шетелдік жұмыс күшін тарту квотасын төмендету саясатын дәйекті түрде жүргізіп келеді.

"Соңғы 5 жылда тартылған шетелдік жұмыскерлер саны 25 мыңнан 17 мыңға дейін төмендеді. Әлеуметтік әділеттілік қағидатын белгілеу, оңтайландыру бойынша жүргізіліп жатқан барлық жұмыстар мемлекет пен қолдауға мұқтаж азаматтар мүддесі теңгерімін қамтамасыз етуге және көрсетілетін қызметтің сапасын арттыруға бағытталған", – деді Светлана Жақыпова.