Қазақстанда бет-жүзді толық жабатын киімдерге қатысты заңға түсініктеме берілді.

Қазақстанда бет-жүзді толық жабатын киім киюге тыйым салу туралы заң нормаларына енгізілген түзетулер 12 шілдеден бастап күшіне енді, деп жазады inbusiness.kz сайты.

ІІМ хабарлауынша, хиджаб секілді бет ашық тұратын діни киімдер бұл шектеуге жатпайды.

– Бет-жүзді толығымен жауып, визуалды тануға, соның ішінде бейнебақылау камералары арқылы анықтауға кедергі келтіретін киімдерді кию заң бұзушылық болып саналады. Ал бетті жаппайтын діни киімдер (хиджаб, шейла, химар, әл-амира және басқа да ұқсас элементтер) бұл нормаға кірмейді, – делінген министрлік хабарламасында.

Тыйымға қатысты заңда бірқатар ерекшеліктер қарастырылған. Бет-жүзді жабуға медициналық көрсеткіштер бойынша, ауа райына байланысты, қызметтік және еңбек міндеттерін орындау кезінде, азаматтық қорғаныс шараларында, сондай-ақ спорттық, мәдени және бұқаралық шаралар барысында рұқсат етіледі.

ІІМ мәліметінше, жаңа нормалардың басты мақсаты – қоғамдық қауіпсіздікті арттыру және бейнебақылау камералары арқылы тұлғаны тану мүмкіндігін қамтамасыз ету.

Полиция өкілдері жаңа ережелер тек қана қоғамдық тәртіп пен қауіпсіздікті қамтамасыз етуге бағытталғанын, ал азаматтардың құқықтары мен бостандықтары, соның ішінде діни сенім бостандығы, бұзылмайтынын ерекше атап өтті.