Шығыс Қазақстан облысының экология департаменті қазан айында заманауи мобильді зертхана сатып алуды жоспарлап отыр.

Жаңа қондырғы қаладағы ауа сапасын нақты уақыт режимінде бақылауға және экологиялық қауіп-қатерлерге жедел ден қоюға мүмкіндік береді, деп жазады inbusiness.kz сайты.

"Қазгидромед" мәліметінше, биылғы жылдың басынан бері Өскеменде 69 күн бойы қолайсыз метеорологиялық жағдай тіркелген. Мұндай кезде ауа қозғалысы бәсеңдеп, зиянды қоспалар қала үстінде шоғырланып, қалың түтін түзеді.

Өткен жылдың қарашасында тұрғындар бір айға жуық уақыт бойы түтінге тұншығып, далада демалу мүмкін еместігін айтып шағымданған еді. Осы оқиғадан кейін "Өскемен тынысы" экологиялық бюросы құрылып, жаңа зертхана сатып алу – бюро қолға алған алғашқы бастамалардың бірі болды.

– Мобильді зертхана ластау көзін жедел анықтап, оқиға орнында бірден өлшеу жүргізуге мүмкіндік береді. Бұл экологиялық бақылаудың ашықтығын арттырып, департамент жұмысының тиімділігін күшейтеді, – деді "Өскемен тынысы" жобалық кеңсесінің жетекшісі Елена Березинская-Абилова.