Ведомствоның 2025 жылғы 5 қыркүйектегі мәліметіне сәйкес, жәрдемақы немесе төлемді өтінішсіз алу мүмкіндігін 200 мыңнан астам азамат пайдаланып үлгерген.
Еңбек және халықты әлеуметтік қорғау министрлігінде (ЕХӘҚМ) хабарлағандай, 2025 жылдың басынан бері Цифрлық отбасы картасын (ЦОК) енгізудің арқасында 349,7 мың қазақстандық әлеуметтік-еңбек саласындағы мемлекеттік қызметтерді проактивті түрде алу үшін SMS хабарлама алған, деп жазады inbusiness.kz сайты.
"Мемлекеттік қолдау шараларын алу құқығы белгіленген кезде әлеуетті алушыға бірыңғай байланыс орталығы 1414-тен SMS-хабарлама жолданады. SMS алған азамат оған келісімін білдіріп жауап беруі тиіс. Өтінішті ресімдеу мен әлеуметтік жәрдемақы немесе төлемді тағайындау автоматты түрде жүзеге асырылады, кейін қаражат алушының банк шотына аударылады", – делінген ЕХӘҚМ баспасөз қызметінің хабарламасында.
Алаяқтық тәуекелдерін болдырмау үшін министрлік SMS-ке тек бірыңғай байланыс орталығы 1414-тен келген жағдайда ғана жауап беру қажеттігін ерекше атап өтті.
"Барлық сұрақтар бойынша 1414 нөміріне хабарласуға болады. Қоңырау шалу тегін", – деп мәлімдеді министрліктің баспасөз қызметі.
Министрліктің еске салуынша, Цифрлық отбасы картасы мемлекеттік органдардың барлық қолданыстағы ақпараттық жүйелеріндегі деректер негізінде қалыптастырылады.
Бүгінгі таңда онда Қазақстанның 20,2 млн азаматы немесе 6,2 млн-нан астам отбасы туралы ақпарат жинақталған.
