Еңбек және халықты әлеуметтік қорғау министрлігінде (ЕХӘҚМ) хабарлағандай, 2025 жылдың басынан бері Цифрлық отбасы картасын (ЦОК) енгізудің арқасында 349,7 мың қазақстандық әлеуметтік-еңбек саласындағы мемлекеттік қызметтерді проактивті түрде алу үшін SMS хабарлама алған.

Сонымен қатар, ведомствоның 2025 жылғы 5 қыркүйектегі мәліметіне сәйкес, жәрдемақы немесе төлемді өтінішсіз алу мүмкіндігін 200 мыңнан астам азамат пайдаланып үлгерген.

"Мемлекеттік қолдау шараларын алу құқығы белгіленген кезде әлеуетті алушыға бірыңғай байланыс орталығы 1414-тен SMS-хабарлама жолданады. SMS алған азамат оған келісімін білдіріп жауап беруі тиіс. Өтінішті ресімдеу мен әлеуметтік жәрдемақы немесе төлемді тағайындау автоматты түрде жүзеге асырылады, кейін қаражат алушының банк шотына аударылады", – делінген ЕХӘҚМ баспасөз қызметінің хабарламасында.

Алаяқтық тәуекелдерін болдырмау үшін министрлік SMS-ке тек бірыңғай байланыс орталығы 1414-тен келген жағдайда ғана жауап беру қажеттігін ерекше атап өтті.

"Барлық сұрақтар бойынша 1414 нөміріне хабарласуға болады. Қоңырау шалу тегін", – деп мәлімдеді министрліктің баспасөз қызметі.

Министрліктің еске салуынша, Цифрлық отбасы картасы мемлекеттік органдардың барлық қолданыстағы ақпараттық жүйелеріндегі деректер негізінде қалыптастырылады.

Бүгінгі таңда онда Қазақстанның 20,2 млн азаматы немесе 6,2 млн-нан астам отбасы туралы ақпарат жинақталған.

ЦОК енгізудегі басты мақсат – қазақстандықтардың мемлекеттік қолдау жүйесіне тең қолжетімділігін қамтамасыз ету.

Осыған байланысты, ҚР Әлеуметтік кодексінде Цифрлық отбасы картасы әлеуметтік саясаттың орта және ұзақ мерзімді міндеттері мен бағыттарын айқындайтын құрал ретінде белгіленген. Сондай-ақ, ЦОК азаматтардың әлеуметтік мәртебесіне байланысты олардың кепілдендірілген мемлекеттік қолдауға құқығы жөнінде күнделікті "электронды ескертуші" қызметін атқарады.

ЕХӘҚМ деректері бойынша, қазір ЦОК мемлекеттік қолдау шараларын алуға құқығы бар қазақстандықтарға ешқандай өтініш бермей-ақ 11 түрлі жәрдемақы мен әлеуметтік төлемдерді ресімдеуге мүмкіндік береді:

• еңбекке қабілеттіліктен айырылған жағдайда төленетін әлеуметтік төлем;
• жұмысынан айырылған жағдайда төленетін әлеуметтік төлем;
• асыраушысынан айырылған жағдайда төленетін әлеуметтік төлем немесе жәрдемақы;
• бала тууға және бала 1,5 жасқа толғанға дейін күтім жасауға арналған жәрдемақылар;
• мүгедектігі бар баланы тәрбиелеп отырған ата-анаға (қамқоршыға) төленетін жәрдемақы;
• мүгедектік бойынша жәрдемақы;
• көпбалалы отбасыларға төленетін жәрдемақы;
• "Алтын алқа" және "Күміс алқа" иеленген көпбалалы аналарға арналған жәрдемақы;

Атаулы әлеуметтік көмек (АӘК), сондай-ақ жерлеуге арналған біржолғы төлем.

Сонымен қатар, ЦОК арқылы зейнетақы төлемдерін алу мүмкіндігі, "қандас" мәртебесін беру/ұзарту мерзімінің аяқталуы және жұмыссыздар үшін жұмыспен қамту шаралары туралы автоматты ескертулер іске асырылған.