Астанада әлемдегі беделді оқу орнының бірі – Кардифф университетінің шетелдегі әрі Орталық Азиядағы алғашқы халықаралық кампусы ашылды. Мазмұнды іс-шараға Қазақстан мен Ұлыбритания үкіметінің өкілдері, сондай-ақ Cardiff University және Cardiff University Kazakhstan басшылығы қатысты.

Салтанатты ашылу рәсімінде Ғылым және жоғары білім министрі Саясат Нұрбек Қазақстан өңірлік академиялық хаб ретінде дамып келе жатқанын айтты.

«Биыл елімізге 31 мыңнан аса ше­телдік студент келді. Мемлекет бас­шы­сының бастамасымен ғылым мен жоға­ры білім саласында ауқымды страте­гия жүзеге асып отыр. Соның бірі – еліміз­де жетекші шетелдік зерттеу универ­ситет филиалдарының ашылуы. Соңғы үш жарым жылдың ішінде 40-қа жуық шетелдік жоғары оқу орны елімізге келсе, оның бесеуі ірі кампустарын ашуға шешім қабылдады», деді министр.

Сондай-ақ С.Нұрбектің айтуынша, бүгінде еліміздің әр өңірінде беделді шетелдік жоғары оқу орындарының филиалдары жұмыс істей бастады. Әрбір серіктеспен он жылдық келісімшарт жасалып, жергілікті оқу орындарын халықаралық стандарттарға сай зерттеу университетіне айналдыру міндеті тұрғанын атап өтті.

Одан кейін сөз алған Cardiff Univer­sity президенті әрі вице-канцлері, профессор Венди Ларнер Қазақстанда тарихи оқу орны филиалының ашылуы зор құрмет екенін жеткізді.

«Бұл – Cardiff University-нің ал­ғашқы халықаралық кампусы. Біз акаде­мия­лық тұрғыдан озат студенттердің алғаш­қы легін қабылдауды асыға күттік. Сон­дай-ақ «Russell Group» құрамындағы Қазақстанда кампус ашқан алғашқы университетпіз. Бүгінгі кампустың ашылуы – үлкен еңбектің нәтижесі. Бұл ретте Қазақстан Үкіметіне біздің ортақ мақсатымызды жүзеге асыруға көрсеткен қолдауына ризашылығымды білдіремін», деді ол.

Айта кетейік, Cardiff University халықаралық рейтингте жоғары орынға ие болған. Мәселен, «QS World Uni­versity Rankings» 2026 нұсқасында 181-орын алса, «Complete University Guide» 2026 нұсқасында 22-орынды иеленген. Зерттеулердің 91 пайызы халықаралық деңгейде үздік деп таныған (REF 2021). Сонымен бірге «Russell Group» мүшелігі Cardiff University-ін Ұлыбританиядағы жетекші зерттеу университетінің бірі ретінде бекіткен. Осы қыркүйектен жұмысын бастаған университет төрт жылдық бакалав­риат бағдарламасына студенттер қабыл­дай­ды. Оқу толық ағылшынша. Дәрісті Cardiff University және Cardiff Uni­ver­sity Kazakhstan профессор-оқыту­шы­­лар құрамы жүргізеді. Аталған оқу ­орны Ұлыбританиядағы бас универ­ситет­тің тікелей басқаруымен жұмыс ­істеп, британдық сапа стандартын қам­тама­сыз етеді. Студенттер кампустар арасында академиялық мобильділік­ке ие болады. Заманауи жатақханамен қам­тылады.