Биыл «Ауыл» партиясының құрылғанына тұп тура 25 жыл толып отыр, деп хабарлайды 24kz.
Ширек ғасыр ішінде саяси ұйым ауылдың көркейіп-гүлденуі үшін маңызды бастамаларға ұйытқы болды. Елдің ауыл шаруашылығы саласын дамыту бағытында іргелі жобаларды жүзеге асырды. Айтулы датаға орай партиялықтар Астанада ғылыми-практикалық конференцияда бас қосып, алдағы даму бағыттарын талқылады.
«Ауыл» партиясы алғаш рет 2000 жылдың 29 наурызында «Шаруалардың социал-демократиялық партиясы» болып құрылды. Саяси ұйым ауылдағы ағайынның мүддесін қорғауды мақсат тұтып, төңірегіне ауылдың болашағына алаңдайтын адамдарды біріктірді. Саяси ұйымның негізін қалағандардың бірі экономист, қоғам қайраткері Оразалы Сәбден партия құру идеясы қалай туғанын айтып берді.
Оразалы Сәбден, «Ауыл» партиясының алғашқы фракциясының жетекшісі, қоғам қайраткері:
- Бірінші бұл идея біз академик Қалиевпен шахмат ойнап отырғанда: «Бір партия ол алысқа кетпейді көп партия болу керек, оның ішінде «Ауыл» партиясы соның алдында болу керек», деген ой келген. Сол кезде біз «Отан» партиясынан шығып, Ғани Қалиевпен «Ауыл» партиясын құрдық. Оған Нұрғали Нұсіпжанов, Әбдіжәміл Нұрпейісов, Дулат Исабеков, Алтынбек Қоразбаев сияқты зиялы қауымдарды қауыштырдық. Бірінші партия болып құрылып, тұңғыш рет тарихта бірінші болып «Ауыл» партиясының фракциясы құрылған.
Ширек ғасырда «Ауыл» партиясы өзінің негізгі саяси бағыттарынан ауытқымады, оны берік ұстанды. Ауыл шаруашылығын дамыту, ауыл тұрғындарының әл-ауқатын арттыру жолында партия бірқатар маңызды бастамалар көтерді. Шаруаларға төмен пайызбен несие беру, ауызсу мәселесін шешу, инфрақұрылымды жақсарту сынды өзекті мәселелер ұдайы партия назарында болды.
Серік Егізбаев, ҚР Парламенті Мәжілісінің депутаты, «Ауыл» партиясының төрағасы:
- Сайлаушыларымыз сеніп, бізге дауыс беріп, бізді Парламентке өтуге жағдай туғызды. Біз агробанк жөнінде, азық-түлік қауіпсіздігі жөнінде заңдарды дайындадық. Бірақ заң қабылдау үрдісі оңай үрдіс емес. Осыдан екі жыл бұрын біздің шаруалар алатын несиелер өздерінің кәсібі үшін, ауылдық кәсібі үшін 22-23% болатын болса, былтырдан бастап 5% болып тұр. Үлкен кепілдеме бағдарламалары бар. Яғни, шаруа 100 млн теңге несие алатын болса, 85% Үкімет кепілдік береді.
Бүгінде саяси ұйымның 300 мыңнан астам мүшесі бар. Еліміздің барлық 20 өңірінде филиалдары жұмыс істейді. Мерейлі датаға орай партиялықтар ғылыми-практикалық конференция өткізіп, саладағы проблемалар мен алдағы даму бағыттарын айқындады.
Авторлары: Ғазиза Мұхамеджанова, Бағдат Қайыркен
