Қазақстанда сиыр еті экспортына квота енгізіледі. Сыртқы сауда саясаты және халықаралық экономикалық ұйымдарға қатысу жөніндегі ведомствоаралық комиссияның отырысында осындай шешім қабылданды, — деп хабарлайды Massaget.kz тілшісі.

Үкіметтің мәліметінше, ішкі нарықтағы бағаның өсуін тежеу және халықты ірі қара етімен жеткілікті көлемде қамтамасыз ету мақсатында сиыр етін экспорттауға уақытша шектеу енгізіледі. Тиісті бұйрық Ауыл шаруашылығы министрлігі тарапынан қабылданады.

Сондай-ақ, жиында Қазақстаннан көлік және теміржол көлігі арқылы бензин, дизель отыны және мұнай өнімдерінің кейбір түрлерін әкетуге тыйым салуды ұзарту туралы шешім қабылданды.

"Бұл шара ішкі нарықты үздіксіз қамтамасыз етуге бағытталған", — деп жазылған хабарламада.

Сонымен қатар, 2026 жылғы қаңтардан бастап жеңіл дистилляттарды, авиациялық керосинді, дизель отынын, толуолды, ксилолды және мұнай битумын ЕАЭО кедендік аумағынан тысқары шығаруға тыйым салу алты айға ұзартылады.

Аптаның басты оқиғалары мен пайдалы видеоларды көру үшін YouTube арнамызға жазылыңыз