Үкімет Алатау қаласының инвестициялық тартымдылығын арттыру мақсатында Астана халықаралық қаржы орталығы моделін қолдануды қарастырып жатыр. Бұл туралы Премьер-министрдің орынбасары Қанат Бозымбаев мәлім етті, деп хабарлайды Inform.kz.

Бүгінде Алатау қаласына ерекше мәртебе беру жұмысы жүріп жатыр, бұл қаланы елдің экономикалық өсу орталығы ретінде қалыптастыруға ықпал етеді. 90 мың гектардан астам аумақ толыққанды экожүйені, іскерлік, жасыл, индустриялық және ғылыми ортаны құруға мүмкіндік береді. Инвестициялық тартымдылықты арттыру мақсатында Үкімет бұл жобаға Астана халықаралық қаржы орталығы моделін қолдану мүмкіндігін қарастырды. Органикалық ауыл шаруашылығы өнімдерін өткізуге арналған халықаралық экспорттық алаңға айналатын агропроцессингтік логистикалық хаб құрылады", — деді Қанат Бозымбаев елордада өтіп жатқан Astana Finance Day — 2025 халықаралық форумында.

Сондай-ақ вице-премьер Алатау қаласында халықаралық білім, медицина және туризм орталығын құру жоспарда барын айтты.

Орталықтар іскерлік бастамалардың, жоғары білікті кадрдың және креативті командалардың басты тартылыс нүктесіне айналып, бүкіл қала экономикасына қуатты мультипликативтік әсер береді. Бизнес қажеттілікке бейімделген заманауи инфрақұрылымның, бизнесті жүргізудің ашық әрі тұрақты жағдай және мемлекеттік қолдаудың арқасында Алатау қаласы Қазақстан мен Орталық Азияның басты инвестициялық және инновациялық орталықтарының біріне айналады", — дейді ол.