Танымал спорт комментаторы Уәлихан Қосанбай бокстан Ұлттық құрамаға қатысты тың ақпаратпен бөлісті. Бұл туралы ол “Бірінші бол” You Tube арнасының бокстан әлем чемпионатына арналған шығарылымында айтты, деп хабарлайды Skifnews.kz ақпарат порталы.

Алайда, комментатор нақты қай боксшының келетінін айтпады.

”Жасырын интрига ретінде бір дүние айтқым келеді. Жақында Өзбекстаннан бір боксшы ауысып келіп қалуы мүмкін. Осы орайда өзіміздің боксшыларымызға айтқым келеді, бізде құдайға шүкір, боксшыларға жағдай жасалған. Мысалы, Өзбекстанда әлем чемпионы болып келіп IBA 100 мың доллар берсе, соның 30 мың доллары ғана боксшының қолына түседі. Қалғанының бәрін бас бапкер, федерация алып қояды. Олимпиададан кейін ғана берген шығар. Қалған турнирлердің барлығында солай. Қатты бақылауда болады. Онымен салыстырғанда Қазақстанның боксшылары әлдеқайда еркін. Сыйақылар тікелей өздерінің банк карточкасына түседі. Соны бағалаңыздар”, — дейді ол.

Ал, бағдарлама жүргізушісі Олжас Байбосынның айтуынша, Қазақстанда бапкерлер боксшылардың “қолына қарап” отыратын көрінеді.

”Бұрын бізде бапкерлерге арнайы қаражат қарастырылмаған екен. Боксшының өзіне береді. Ол ары қарай бапкеріне берсе берді, бермесе ол да жоқ. Қазір 70/30 қылып қойыпты. Арнайы заңмен емес, бірақ ішкі ереже сондай. Ойлаңызшы, бапкері споршының қолына қарап отырады. Беріп қалады ма екен, қанша береді екен, бермей қала ма деп. Өзбекстанда Толқын Қылышев мынаны әкел, қазір бөлеміз деп бірінші алады-ау”, — дейді ол.

Айта кету керек, бокстан Ұлттық құрамаға өзбекстандық спортшы қосылатыды деген ақпаратқа қатысты Қазақстан бокс федерациясы ешқандай мәлімдеме жасаған жоқ.