Елордада "Қылмысты тоқтату" жедел алдын алу шарасы барысында криминалдық полиция қызметкерлері заңсыз жұмыс істеген ет өңдеу және сату цехтарын анықтады.

Тексеру кезінде гараж түріндегі үй-жайда 39 жастағы азамат ет өнімдерін санитарлық талаптарға мүлде сай келмейтін жағдайда өңдегені анықталды, деп жазады inbusiness.kz сайты.

Оқиға орнынан тәртіп сақшылары жалпы салмағы 600 келіден асатын ірі қара мен жылқы етін, сондай-ақ тартылған етке арналған шикізатты тәркіледі.

Сонымен қатар, 37 жастағы тағы бір азаматтың ешқандай рұқсат құжаттарынсыз, қосалқы үй-жайда ет өнімдерін заңсыз саудалап келгені анықталды. Тәркіленген өнімдерге зертханалық сараптама тағайындалды. Нәтижесіне қарай олардың жойылуы немесе басқа шешімі қабылданады. Заң бұзушыларға қатысты тиісті әкімшілік хаттамалар толтырылып, жауапкершілікке тарту шаралары қабылдануда. Астана қалалық полиция департаменті ветеринарлық бақылаудан өтпеген ет өнімдері адам денсаулығына елеулі қауіп төндіруі мүмкін екенін ескертеді.

"Мұндай өнімдердің көлеңкелі жолмен келуі және олардың шығу тегі белгісіз болуы — тұтынушылар үшін аса қауіпті", — делінген хабарламада.