Депутаттар жекеменшік мектептерге автобустарды жалға алуды ұсынды.

Алматылық студенттердің сабағы енді таңғы сағат 7 жарымға, ал кейбір қызметкерлердің жұмысы онлайнға ауысуы мүмкін, деп хабарлады 31 арнаның Информбюро ақпараттық бағдарламасы.

Қаладағы сыздауықтай мазалаған кептеліс мәселесін шешу үшін мәслихат депутаттары осындай ұсыныс жасады. Халық қалаулылары одан бөлек, баласын өз көлігімен тасып жүргендерді мектеп автобусына ауыстыру бастамасын көтеріп отыр.

Алматының кептелісі қаланың бейресми "символына" айналғандай. Етіміз үйренгені сонша, солай болуы керектей кейде сабырмен, көбіне ашумен қабылдап жүрміз. Депутаттардың пікірінше, бұл кептеліс барлығының бір уақытта жолға шығуының салдарынан болып жатыр. Сондықтан да олар сабақтың уақытын жылжытып, қызметкерлердің көбін қашықтан жұмыс істеуге ауыстыруды ұсынып отыр.

Мысалы, депутаттар екі ауысымда оқитын студенттердің сабағын 8-де емес, таңғы 7 жарымда, ал түстен кейінгілердің оқуы 10 немесе 11:00-де басталса дейді. Мүмкіндік туса банк, үкіметтік емес ұйымдар мен нотариус, жеке компания қызметкерлерінің жұмысын жартылай болса да онлайнға көшіруді ұсынады. Ал мемлекеттік органдар 8 жарымнан кешкі 6-ға дейін жұмыс істемек.

"Колледждер мен университеттерге сабақтың басталу уақытын жылжыту, мемлекеттік органдардың жұмыс кестесін өзгерту көлік ағынын реттеуге көмек береді. Әсіресе таңғы уақытта. Нәтижесінде басты көшелер босайды. Инфрақұрылым жұмысын жақсартады", – деді Алматы Қалалық Мәслихатының Депутаты Қарашаш Джузеева.

Депутаттар сондай-ақ жекеменшік мектептерге автобустарды жалға алуды ұсынды. Осылайша ата-ана баласын жеке көлігімен емес, қоғамдық көлікпен жібере алады. Сәйкесінше мектеп маңындағы кептеліс азаяды деген пайым бар. Жалпы халық қалаулыларының кептеліс үшін сабақ кестесін, жұмыс уақытын ауыстыруға қатысты ойын халықтың өзі әртүрлі қабылдайды.

Полиция дерегіне сүйенсек, бүгінде Алматыда тіркелген көлік саны шамамен 600 мың, ал сырттан күніне кіріп-шығатын транспорт 350 мыңнан асады. Яғни, миллионға жуық. Депутаттарының бастамасы әзірге тек ұсыныс. Ал елордада қыркүйектің 15-нен бастап кептелісті шешу үшін бірқатар коммуналдық кәсіпорындар мен мемлекеттік компаниялардың жұмысы кешірек басталмақ.