Білім күніне орай Алматыда елімізде алғашқы тегін оқытатын «Жабық арқан алаңы » мен «Инклюзивті шығармашылық орталығы» ашылды.

Бұл игі бастама – ерекше қажет­тіліктері бар балалардың еркін ойнап, қоғамға бейімделіп, шығар­машылық әлеуетін дамытуына бағытталған.

«Жабық арқан алаңы» – заманауи талаптарға сай жасалған, ерекше балалардың қозғалыс пен ойын арқылы еркіндігін сезініп, сенімін нығайтуға арналған бірегей кеңістік. Мұнда балалар тегін білім алып, олар қоғаммен араласуды үйреніп, жаңа мүмкіндіктерін ашады. Ал «Инклюзивті шығармашылық орта­лығында» балалар вокал, би, сурет, қолөнер үйірмелеріне және әр жастағы студияларға қатысып, өз дарынын шыңдайды. Сондай-ақ ерекше білім беру қажеттіліктері бар балалар кәсіби педагогтерден дәріс алады.

Айта кетейік, «Балалар инклюзивті академиясы» кейінгі үш жыл бойы Алматыда тегін инклюзивті білім беру кеңістігін дамытып келеді. Бүгінде оның ел көлемінде 15 филиалы жұмыс істейді. Олардың бесеуі ресми мектеп ретінде лицензия алуға құжатын тапсырған.

Ұйымның негізін қалаушы – «Балалар инклюзивті академиясы» қоғамдық бірлестігі орталығының басшысы, үздік педагог Нұрым Нұрғалиев. Оның бастамасымен мектептерде арнайы кабинеттер ашылып, ерекше балаларға тегін шығармашылық курстар ұйымдастырылды. Бүгінде Астана, Алматы, Қостанай, Рудный, Қарағанды қалаларында 500-ден астам бала тұрақты түрде білім алады. Маң­­­­­­­­­ғыс­тау өңі­­­­рінде де жүйелі жұмыс жолға қойылған.

Орталықтың ашылу рәсімінде Нұрым Нұрғалиев ата-аналар мен балаларды Білім күнімен құттықтап, ізгі лебізін білдірді.

«Біздің мақсатымыз – ерекше білімді қажет ететін балаларға тең мүмкіндік беру, олардың шығар­­ма­­шылық қабі­летін шыңдауға жағдай жасау, қоғамда инклюзия мәдениетін кеңінен насихаттау», деді ол.

Сонымен қатар мерекелік шарада эстрада әншісі Кенжебек Нұрдолдай әсем әнімен ерекше балаларға шабыт сыйлады.

Қазіргі таңда «Балалар инклюзивті академиясында» 200-ден астам бала оқиды. Жыл сайын бұл көрсеткіш артып келеді. Жобаның маңызды тұсы – балаларды «үйде оқытудан» тыс, қоғамға бейімдеу, құрдастарымен бірге дамуына мүмкіндік беру. Қысқасы, ерекше балаларға арналған бұл бас­тама – еліміздегі білім мен мәдениет саласында инклюзияны дамытудағы маңызды қадам.

Азат ЕСЕН