2024 жылы Назарбаев университеті ақылы негізде оқуға түскісі келетін талапкерлер үшін талаптардың жеңілдегені туралы хабарлаған еді, ол кезде IELTS бойынша 6.0 ең төменгі балл деп белгіленген болатын — негізінде бұл талап Ұлыбританияның Russell Group тобына кіретін оқу орындары сұранысымен бірдей. Бұл қадам қоғамда біраз сұрақ тудырған: талаптардың жеңілдеуі оқу сапасының төмендеуіне әкелмейді ме? Атап айтқанда, университет түлектері енді білім сапасы төмендеп, диплом мәртебесі де түседі деп қатты алаңдаушылық танытқан.

Дегенмен бір жыл өткеннен кейінгі көрсеткіштер басқаша дейді:

• Биыл оқу орнына түсуге 10 мыңнан астам талапкер ниет білдірген — бұл көрсеткіш өткен жылмен салыстырғанда 40%-ға артық.
• Оқуға қабылданғандар арасында IELTS-тың орташа баллы – 7,5. Бұл Қазақстандағы оқу орны үшін өте жоғары көрсеткіш. Өткен жылы бұл көрсеткіш бакалавриат үшін 7,3, университет алдындағы бағдарлама үшін 6,9 болған. Осылайша, талапкерлер арасындағы конкурс жоғары күйінде қалды деп сеніммен айтуға болады.

Университетке бұрынғыша еліміздегі ең талантты жастар оқуға қабылдануда. NU студенттерінің сапасы түскен жоқ, керісінше одан әрі жақсаруда. Осы ретте талаптарды түсіргені үшін NU-ға айтылған сын орынды ма? Бұл туралы әлеуметтік желілерде университеттің бұрынғы қызметкерлері мен түлектер көп жазған. Дегенмен соңында бұл шешім оң нәтиже көрсетіп отыр.

Университет вице-президенті Әсел Увалиева мұндай сын университетке қоғам тарапынан қойылатын талаптардың жоғары болғанынан дейді: "Соңғы жылдары университетте білім алғысы келетіндер қатары тұрақты түрде артып келеді, мәселен, 2023 жылы – 5 мыңнан астам, 2024 жылы – 6 мыңнан астам, биыл – бірден 10 мыңнан астам. NU түлектерінің 98%-ы оқу бітіргеннен кейін бір жыл ішінде жұмысқа орналасады немесе әрі қарай оқуын жалғастырады".

Оған қоса жақында ғана оқу орны QAA аккредитациясын алды – бұл жоғары білім сапасын сырттан бағалайтын британиялық тәуелсіз QAA (Quality Assurance Agency) агенттігіне тиесілі. Ол оқу орындарын басқару тиімділігі, академиялық адалдық және студенттерге қолайлы жағдай жасау сияқты халықаралық стандарттарға тексереді.

NU президенті профессор Вакар Ахмад университет дамуында қолға алынған кез келген өзгеріс оның өңірдегі жетекші зерттеу университеті ретіндегі орнын нығайту және тұрақты болашаққа жол ашу үшін бағытталғанын айтты. Менің мақсатым – қалыптасқан құндылықтарды бұзу емес, керісінше, университеттің мықты тұстарын күшейту. Барлық шешім негізінде – NU әлемдік деңгейдегі оқу орны болып, Қазақстанның мақтанышына айналсын деген ұмтылыс жатыр.

NU бұрынғыша Times Higher Education (THE WUR) рейтингі бойынша әлемнің ең үздік университеттерінің 24-29%-ы қатарына кіреді, ал "Білім" бағыты бойынша (World University Subject Rankings 2025) – әлемнің ең үздік 200 оқу орны қатарында.

Мәтіннен қате тапсаңыз, бізге жазыңыз