Air Astana әуекомпаниясының баспасөз қызметі Алматыдан Ақтауға шыққан ұшақ шұғыл қонуға мәжбүр болғанын растады, деп хабарлайды Kazinform.

Ақпарат агенттігінің жзуынша, әлеуметтік желіде ұшақ бортындағы жағдай туралы видео тараған. Жолаушылардың айтуынша, ұшақ әуеге көтерілген кезде борттан біртүрлі шуыл шыққан. Ал 30-40 минуттан кейін ұшақ төмендеген.

Бұл оқиғаға қатысты агенттікке пікір білдірген Air Astana компанияның баспасөз қызметі өкілдерінің мәліметінше, ұшақтан техникалық ақау шыққан.

"31 тамызда Алматы-Ақтау бағытына шыққан КС 859 рейсінің экипажы Ақтауға жете бере, техникалық ақау туралы хабар беріп, нұсқаулыққа сай бірінші болып қонуға рұқсат сұрады. Осыдан кейін ол қауіпсіз эшелонының көмегімен Ақтау әуежайына аман қонды", — деп мәлім еткен компанияның баспасөз қызметі.

Қазір ұшақтағы ақау неден шыққаны тексеріліп жатыр. Аталған рейстің барлық жолаушысы басқа әуе кемесіне ауыстырылған.

Мәтіннен қате тапсаңыз, бізге жазыңыз