Сандықтаудың қойнауынан тағы бір жәдігер шықты , — деп хабарлайды Massaget.kz тілшісі 24kz-ке сілтеме жасап.

Көне түркі дәуіріне жататын тас қабырғалар мен тас өңдейтін арнайы орындар Балкашино ауылының маңынан табылды. Археологтардың айтуынша, тарихи ескерткіштер VI-XI ғасыр аралығында өмір сүрген адамдардың тұрмыс-тіршілігінен сыр шертеді.

Сандықтау – қойнауына сан ғасырдың сырын жасырған қасиетті мекен. Былтыр осы ауданның аумағынан тасқа қашалған артефакт табылған еді. Археологтар биыл да мол олжаға кенеліп отыр.

"Биыл табылған жәдігерлер осы аймақтың тарихына жаңа көзқараспен қарауға және нақты даталарын анықтауға мүмкіндік береді. Егер бұл ескерткіштер ортағасырлық кезеңге жататын болса, онда бұл өңірдегі өркениеттің үздіксіз дамуын көрсетеді. Ескерткіштердің кейбір ерекшелігін анықтау үшін геосканерлеу жүргізіледі. Яғни, біз дәстүрлі археологиялық әдістермен қатар заманауи зерттеу әдістерін де қолданамыз", — деді Л.Н.Гумилёв атындағы Еуразия ұлттық университетінің аға оқытушысы Данияр Тілеуғабылов.

"Көбіне мұндай тарихи жәдігерлер жазық даладағы қазба жұмыстары барысында табылады", — дейді мамандар. Десе де, Сандықтау ауданы – орманды алқап. Сондықтан археологтар осы жолғы олжаны ерекше жаңалыққа балайды.

"Ерекшелігі – мұндай тасқа бейнелеген адамның бет-бейнесі және мынадай тас қабырғалар Қазақстан бойынша бірен-сараң кездеседі. Бурабай ауданында табиғи қалыптасқан тастар бар. Бертін келе XX ғасырдың басында салынған тастар. Қабырға ретінде қолданған. Аналогия ретінде. Ал бірақ Сандықтаудағы тас қабырға бұрын-соңды ешқайда кездеспеген", — дейді облыстық тарихи-мәдени мұраны қорғау және пайдалану орталығының директоры Жасұлан Үкеев.

"Қазір табылған жәдігердің бәрін біртұтас археологиялық кешен деп айта аламыз. Бірақ оны ғылыми тұрғыда толыққанды жарыққа шығару үшін біз мұнда өмір сүрген адамдардың қонысын табуымыз керек. Сонда ғана біз олардың қандай мәдениетке, қай дәуірде қолданылғанын біле аламыз", — деді Л.Н.Гумилёв атындағы Еуразия ұлттық университетінің аға оқытушысы Данияр Тілеуғабылов.

Сондай-ақ археологиялық кешеннен 10 шақты діни-рәсімдік қорғандар мен ұзындығы 450-500 метрді құрайтын жасанды тас қабырғалар табылды. Ғалымдар бұл түркі дәуірінде діни рәсімдерді өткізуге арналған қасиетті орын болған деп болжап отыр. Жалпы қазір өңірде 1034 археологиялық ескерткіш бар.

Қызықты жаңалықтар мен видеоларды көру үшін TikTok арнамызға жазылыңыз!